لاہور: پنجاب کے شہر شیخوپورہ کے مسلم لیگی رہنماؤں کے درمیان شدید سیاسی اختلافات کے باعث مریم نواز مشکل میں پڑ گئی ہیں۔
مسلم لیگ ن کے ذرائع کے مطابق پارٹی کی سینئر نائب صدر اور چیف آرگنائزر مریم نواز کے شیخوپورہ کے الگ الگ تنظیمی دوروں کا معاملہ سامنے آیا ہے، جس کی وجہ رانا تنویر حسین اور وفاقی وزیر جاوید لطیف میں شدید سیاسی اختلافات ہے۔
ذرائع کا کہنا ہے کہ اختلافات کے باعث شیخوپورہ میں الگ الگ تاریخوں میں کنونشنز کا انعقاد ہوگا، ن لیگ کی جانب سے 7 اور 8 مارچ کو شیخوپورہ میں تنظیمی کنونشن اور پارٹی اجلاس کا اعلان ہوا ہے۔
تاہم پارٹی ذرائع نے بتایا ہے کہ اب مریم نواز آج شیخوپورہ کا صرف ایک روزہ دورہ کریں گی، آج 7 مارچ کے منتظمین میں لیگی ایم این اے جاوید لطیف اور ان کے ساتھی شامل ہیں۔
دوسری طرف رانا تنویر نے 14 مارچ کو شیخوپورہ میں کنونشن کے انتظامات شروع کر دیے ہیں، مریم نواز ممکنہ طور پر 14 مارچ کو شیخوپورہ کا دوبارہ دورہ کریں گی۔
ذرائع کے مطابق میاں جاوید لطیف اور رانا تنویر حسین گروپوں میں تنظیمی سطح پر شدید اختلافات پائے جاتے ہیں۔
ادھر مسلم لیگ ن کی ترجمان مریم اورنگزیب نے بیان میں کہا ہے کہ مریم نواز آج سے شیخو پورہ کا 2 روزہ دورہ شروع کریں گی، مسلم لیگ ن شیخو پورہ کا تنظیمی کنونشن آج ہوگا، جب کہ شیخو پورہ کی پارٹی کا تنظیمی اجلاس کل 8 مارچ کو ہوگا۔ یوتھ، خواتین اور سوشل میڈیا ونگز کے الگ الگ اجلاس ہوں گے۔
