اسلام آباد: وزیر مملکت برائے اطلاعات و نشریات مریم اورنگزیب نے کہا ہے کہ عوام کا نواز شریف سے پیار دیکھ کر عمران خان پریشان ہیں، عمران خان کوئی شرم ہوتی ہے کوئی حیا ہوتی ہے۔
ان خیالات کا اظہار انہوں نے میڈیا سے گفتگو کرتے ہوئے کیا، مریم اورنگزیب کا کہنا تھا کہ تنقید کرنے سے پہلے توانائی کے منصوبے لگا کر دکھائیں، تنقید کرنے والے پنجاب جیسی فرانزک لیب بنا کر دکھائیں۔
انہوں نے کہا کہ کچھ لوگ جھوٹ بولتے نہیں تھکتے لیکن اب عوام تھک چکی ہے، تنقید کرنے والوں سڑکوں کا جال بچھا کر دکھاؤ تب ہی عوام مانے گی۔
مریم اورنگزیب نے ن لیگ کے حریفوں پر تنقید کرتے ہوئے کہا کہ تبدیلی کے نعرے لگانے والوں کی حقیقت کھل کر سامنے آگئی، عوام انہیں جان چکی ہے، عوام نوازشریف کو دوبارہ منتخب کریں گے اور وہ ووٹ کے تقدس کا احترام کرتے ہوئے عوام سے کیا وعدہ پورا کریں گے۔
یہ کون سا قانون ہےکہ نامکمل ریفرنس پرکارروائی شروع کردیں‘ مریم اورنگزیب
مریم اورنگزیب کا مزید کہنا تھا کہ عمران خان چار سال میں خیبر پختونخواہ کے عوام کو ایک منصوبہ بھی نہ دے سکے، عام انتخابات میں عوام کا مینڈیٹ مسلم لیگ (ن) کا مقدر بنے گا۔
ایک طرف سی پیک اوردوسری طرف کنٹینرسیاست جاری ہے‘ مریم اورنگزیب
دوسری جانب گزشتہ دنوں وفاقی وزیر اطلاعات مریم اورنگزیب نے کہا تھا کہ کوئی مشکل ترقیاتی اہداف کےحصول سےنہیں روک سکتی، پاکستان میں جمہوریت توانا ہے اور پارلیمانی نظام مضبوط ہورہاہے، ملک میں آئین وقانون کی حکمرانی ہے،ادارے بااختیار ہیں۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
