کراچی میں اسٹریٹ کرمنلز نے میٹرک کےطالب علم کی جان لےلی۔
تفصیلات کے مطاق ماچکو مواچھ گوٹھ میں ڈاکوؤں نےموبائل نہ دینے پر مزمل کو گولی مار دی، لواحقین نے حب ریور روڈ پر لاش رکھ کراحتجاج کیا۔
واقعہ مواچھ گوٹھ میں پیش آیا جہاں بسمہ اللہ کالونی کا نوجوان مزمل ڈکیتی مزاحمت پر قتل کر دیا گیا۔ مشتعل افراد نے حب ریور روڈ پر لاش رکھ کر دھرنا دے دیا۔
مظاہرین کا کہنا تھا کیماڑی پولیس ان کے علاقے میں امن و امان کے قیام میں ناکام ہو گئی ہے، اسٹریٹ کرمنلز بلاخوف علاقے میں گھومتے نظر آتے ہیں اور پولیس کوئی کارروائی نہیں کرتی۔
پولیس نے مزمل کے ورثاء کو قاتلوں کی جلد گرفتاری کی یقین دہانی کروائی ہے جب کہ مظاہرین کا کہنا ہے کہ ملزمان گرفتار نہ ہوئے تو احتجاج کا دائرہ وسیع کریں گے۔
حب ریور روڈ پر احتجاج کے باعث کراچی سے حب آنے جانے والی مال بردار گاڑیاں بھی کئی گھنٹوں تک پھنسی رہیں۔