آسٹریلیا سے تعلق رکھنے والے پاکستانی ٹیم کے منٹور میتھیو ہیڈن نے شاہین شاہ آفریدی کے زخمی ہونے کو انگلینڈ کے خلاف ورلڈکپ فائنل کا ٹرننگ پؤائنٹ قرار دے دیا۔
میلبرن میں نمائندہ اے آر وائی نیوز شاہد ہاشمی سے گفتگو کرتے ہوئے میتھیو ہیڈن نے کہا کہ شاہین آفریدی کا انجرڈ ہونا سب سے بڑا ٹرننگ پؤائنٹ تھا کیونکہ انگلینڈ اس وقت تک مشکلات میں تھا۔
انہوں نے کہا کہ قومی ٹیم نے 20 سے 25 رنز کم بنائے جس سے کافی فرق پڑا، تھوڑا مشکل تھا لیکن ہمیں ٹیم کی تعریف کرنا ہو گی جس نے پورے ٹورنامنٹ میں اچھی کارکردگی کا مظاہرہ کیا۔
ان کا کہنا تھا کہ سب یہی چاہتے تھے کہ آج ٹیم اچھا نتیجہ پیش کرے اور حقیقت یہی ہے کہ سب نے محنت کی اور جان لڑائی، کھلاڑیوں نے آخر تک بھرپور کوشش کی۔ میتھیو ہیڈن نے کہا کہ پچ ٹریکی تھی اور باؤنس بھی تھا۔
دوسری جانب بابراعظم نے شاہین آفریدی کے زخمی ہو کر میدان سے باہر جانے کو بڑا نقصان قرار دیا جب کہ ٹی ٹوئنٹی ورلڈکپ فاتح ٹیم کے کپتان جوز بٹلر نے عادل رشید کے اوور کو پاکستان کے خلاف فائنل کا ٹرننگ پوائنٹ قرار دیا۔
