سربراہ دارالعلوم ندوۃ العلما لکھنو، مفسرقرآن،محدث العصر،سیرت نگار، عظیم مورخ وداعی، شہرہ آفاق محقق وادیب حضرت مولاناسید رابع حسنی ندوی انتقال کرگئے۔
تفصیلات کے مطابق علم و عمل کے راہی اور اپنی زندگی اشاعت اسلام کے لیے وقف کرنے والے مولانا سید محمد رابع حسن ندوی بھارت میں انتقال کرگئے۔
حضرت مولانا سیدابوالحسن علی حسنی ندوی رحمۃ اللہ علیہ کے محبوب بھانجہ ، معتمد اور ان کی وفات کے بعد ان کے جانشین مولانا سید محمد رابع حسنی ندوی بھارتی ریاست اترپردیش کے شہر بریلی میں انتیس اکتوبر انیس سو انتیس میں پیدا ہوئے۔
آپ نے اپنے ماموں مولانا سیدابوالحسن علی ندویؒ کی رہنمائی میں تعلیم وتربیت پائی۔ آپ دارالعلوم ندوۃ العلماء سے تعلیم مکمل کرکے پھر وہیں استاد مقرر ہوئے۔ اور تمام علوم وفنون آپ کے زیردرس رہے۔ وقت کے ساتھ ساتھ آپ نے مختلف مناظل طے کیں اور ناظم کے منصب پر فائز ہوئے۔
حضرت مولانا سید محمد رابع حسنی ندوی رحمۃ اللہ علیہ کا انتقال ہوگیا ہے اللہ تعالیٰ حضرت کی مغفرت فرمائے اور اعلی علیین میں جگہ عطا فرمائے
نماز جنازہ رات دس بجے دار العلوم ندوۃ العلماء میں ادا کی جائے گی کل بروز جمعہ صبح تکیہ کلاں رائے بریلی میں تدفین عمل میں آئے گی— Salman Nadwi (@Salmanalnadwi) April 13, 2023
آپ آل انڈیا مسلم پرسنل لاء بورڈ کے صدر بھی رہے۔ مولانا رابع حسنی ندوی رابطہ عالم اسلامی اور اسلامک سینٹر آکسفورڈ یونیورسٹی کے تاسیسی رکن بھی تھے۔
مولانا کی تصنیف کردہ متعدد کتابیں دارالعلوم ندوۃ العلماء کے تعلیمی نصاب کا حصہ ہیں۔ آپ کی سب سے زیادہ پڑھی جانے والی سیرت نبوی پرکتاب رہبرانسانیت کا ترجہ اردو، انگریزی، ہندی اور عربی زبان میں موجود ہے۔ قرآن مجید کے مضامین پر مشتمل کتاب "قرآن مجید ایک رہبر کامل” بھی آپ کی صلاحیتوں کا منہ بولتا ثبوت ہے۔
