لاہور: سانحہ 9 مئی کے بعد سیاسی جماعت سے وابستگی رکھنے والے شر پسندوں کے اعترافات کا سلسلہ جاری ہے۔
تفصیلات کے مطابق سانحہ 9 مئی کو ایک ماہ سے زائد عرصہ گزر گیا، سیاسی جماعت سے وابستگی رکھنے والے شر پسندوں کے اعترافات کا سلسلہ جاری ہے، زمان پارک میں ہونے والی سازش کو سیاسی جماعت کے اپنے کارکنان نے اس ایک ماہ میں بے نقاب کردیا۔
رپورٹ کے مطابق ایک ماہ سے زائد عرصہ میں جن اہم لوگوں نے انکشافات کئے، ان کے مطابق جناح ہاوٴس میں ہونے والی شرانگیزی کی مکمل منصوبندی چیئرمین پی ٹی آئی کی گرفتاری سے ایک دن پہلے ہی ہو چکی تھی۔
رپورٹ میں کہا گیا کہ کارکنان نے تسلیم کیا کہ یاسمین راشد اور اعجاز خان نے زمان پارک میں موجود کارکنان کو جناح ہاوٴس کوچ کرنے کی ہدایت دی تھی۔
گرفتار پی ٹی آئی کارکن کا بتانا ہے کہ چیئرمین نے اپنی گرفتاری سے ایک دن پہلے میٹنگ بلائی اور انتشار کا مکمل منصوبہ تیار کرلیا تھا، عمران خان نے اپنی گرفتاری سے پہلے ہی جناح ہاوٴس پہ حملے کا منصوبہ بنالیا تھا۔
کارکنان نے بتایا کہ 9 مئی کو شرانگیزی اور انتشار پھیلانے کے بعد عمران خان نے خود کو بچانے کے لیے ایجنسیوں پہ الزام تراشی کا آغاز کیا تھا۔
کارکنوں نے اعتراف کیا کہ وزارت عظمیٰ کے چھنتے ہی عمران خان نے افواج پاکستان کے خلاف زہر اْگلنا شروع کردیا تھا، 9 مئی کو لندن پلان کا نام دینے والے عمران خان کے اپنے کارکنان نے اعتراف کیا کہ تمام منصوبہ بندی زمان پارک میں کی گئی تھی۔
کارکنان نے بتایا کہ جناح ہاؤس میں جلاؤ گھیراؤ کے وقت پی ٹی آئی کے سرغنہ حسان نیازی بھی موجود تھے اور کورکمانڈر کی یونیفارم کی عصمت دری میں مصروف تھے۔
