لاہور: نامور پاکستانی اداکارہ مایا علی نے سوشل میڈیا سے عارضی طور پر دوری اختیار کرنے کا اعلان کردیا۔
مایا علی نے کرونا وائرس پھیلنے کے بعد سے خود کو گھر تک محدود کیا ہوا تھا اور وہ اپنے انسٹاگرام اکاؤنٹ پر دلچسپ پوسٹ شیئر کرکے مداحوں کی حوصلہ افزائی کررہی تھیں۔
اداکارہ نے اپنے تصویر شیئر کرتے ہوئے اعلان کیا کہ وہ سوشل میڈیا سے عارضی دوری اختیار کررہی ہیں۔
مایا علی نے لکھا کہ ’میں جانتی ہوں کہ اس صورت حال سے نمٹنے کے لیے ہر شخص کچھ نا کچھ کررہا ہے، میں پہلی بھی کہہ چکی اور امید رکھتی ہوں کہ یہ وقت بھی گزر ہی جائے گا‘۔
مزید پڑھیں: قرنطینہ میں کیا کام کیے جاسکتے ہیں؟ مایا علی نے بتادیا
اداکارہ نے لکھا کہ ’اس کڑے وقت کو اچھے انداز سے گزارنے کے لیے ہر شخص اپنی طور پر بہترین کرنے کی کوشش کررہا ہے، میں نے بھی سوچا کہ یہ بہترین وقت ہے جب میں اپنے اندر کے (روحانی) سکون کو تلاش کروں اور خود کو بہتر کروں، اس لیے میں عارضی طور پر سوشل میڈیا سے دوری اختیار کررہی ہوں‘۔
مایا نے لکھا کہ ’میں اللہ کا بے حد شکر ادا کرتی ہوں جس نے مجھے اتنی رحمتوں سے نوازا، ہمیں کبھی اُن رحمتوں کے بارے میں سوچنا چاہیے جو رب نے ہم پر کی ہوئی ہیں‘۔
اداکارہ نے لکھا کہ اشیائے ضروریہ (راشن) کی تقسیم کے حوالے سے وہ وقتاً فوقتاً آگاہ کرتی رہیں گی۔ مایا نے اُن تمام لوگوں کا شکریہ بھی ادا کیا جو غریبوں کے لیے مشکل وقت میں امید کی کرن بن کر سامنے آئے۔
یہ بھی پڑھیں: کرونا ٹیسٹ کی رپورٹ کلیئر آنے کے بعد مایا علی احتیاطی تدابیر پر عمل پیرا
اداکارہ نے اس پوسٹ میں اپنے مداحوں کو ایک بار پھر مشورہ دیا کہ وہ اپنی حفاظت کریں اور زیادہ سے زیادہ گھروں پر ہی قیام کریں۔