اسلام آباد: پاکستان مسلم لیگ ن کے مرکزی رہنما اور وفاقی وزیر احسن اقبال نے کہا ہے کہ مردم شماری کا مقصد معاشی منصوبہ بندی کرنا ہے۔
خالد مگسی کی زیر صدارت قومی اسمبلی کی قائمہ کمیٹی برائے منصوبہ بندی و ترقی کا اجلاس ہوا، اجلاس میں چیف شماریات ڈاکٹر نعیم الظفر نے ڈیجیٹل مردم شماری پر بریفنگ دی۔
اجلاس میں موجود وفاقی وزیر ترقی ومنصوبہ بندی احسن اقبال نے کہا کہ مردم شماری کا مقصد معاشی منصوبہ بندی کرنا ہے، بھارت نے نمائندگی اور وسائل کو مردم شماری سے نکال دیا تھا لیکن پاکستان میں یہ نظام ابھی بھی چل رہا ہے جس کی وجہ سے مسائل ہیں۔
بغاوت پر آمادہ شخص سے مذاکرات ممکن نہیں، احسن اقبال
انہوں نے کہا کہ جن علاقوں میں آبادی کم ہے ان کو ہم کہتے ہیں آبادی بڑھاؤ اور وسائل لے لو، اب ہمیں اپنی آبادی کو کنٹرول کرنے کیلئے سنجیدہ اقدامات کرنے ہونگے۔
احسن اقبال نے مزید کہا کہ مردم شماری کے لیے 34 ارب روپے لگیں گے اس کے لیے ارکان پارلیمنٹ سے مشاورت کرنا ضروری ہے۔
دوسری جانب چیف شماریات ڈاکٹر نعیم الظفر نے بریفنگ دی کہ 12 اپریل 2021 میں حکومت نے 7ویں ڈیجیٹل مردم شماری کا فیصلہ کیا، جنوری 2022 میں مشترکہ مفادات کونسل نےاس کی منظوری دی۔
ڈیجیٹل چیف شماریات نے مزید بتایا کہ ڈیجیٹل طریقہ کار کے تحت مردم شماری کی جارہی ہے، اب تک 12 کروڑ 70 لاکھ افراد کی مردم شماری کی گئی ہے، ہم نے اپنے ہدف سے زائد مردم شماری کی ہے۔
