بھارتی ریاست مغربی بنگال کی اسمبلی میں حکمران جماعت اور اپوزیشن کے ارکان گتھم گتھا ہوگئے، بی جے پی کے 5 اراکین کو معطل کردیا گیا۔
بھارتی میڈیا کے مطابق بھارت کی مغربی بنگال اسمبلی میں پیر کو بجٹ سیشن کے آخری دن بھاتیہ جنتا پارٹی (بی جے پی) کے رکن اسمبلی نے “بیر بھوم تشدد” پر بحث کے مطالبے پر ممتا بینرجی کی حکومت کے خلاف نعرے لگائے جس کے بعد ترنمول اور بی جے پی کے اراکینِ اسمبلی آپے سے باہر ہوگئے۔
اس موقع پر اسمبلی کے اراکین ایک دوسرے پر ٹوٹ پڑے اور ایسا رن پڑا کہ کان پڑی آوازیں بھی سنائی نہیں دیں اور ایوان کسی اکھاڑے کا منظر پیش کرنے لگا جہاں اراکین ایک دوسرے سے دست وگریباں ہوتے رہے اس دوران حکومتی جماعت کے ایک رکن زخمی بھی ہوگئے۔
بھارتی ذرائع ابلاغ کے مطابق ایوان میں کارروائی کے دوران بی جے پی رکن اسمبلی منوج ٹگا اور ترنمول رکن اسمبلی است مجمدار کے درمیان ہاتھا پائی ہوئی، جس میں است مجمدار شدید زخمی ہوئے اور انہیں ہسپتال منتقل کیا گیا جب کہ ہنگامہ آرائی کے الزام میں اپوزیشن لیڈر سوبھیندو ادھیکاری سمیت پانچ بی جے پی اراکینِ اسمبلی کو کارروائی سے معطل کردیا گیا ہے۔
معطل ہونے والے بی جے پی اراکینِ اسمبلی میں سوبھیندو ادھیکاری کے علاوہ منوج ٹگا ، دیپک برمن ، نرہری مہتو اور شنکر گھوش شامل ہیں۔
اس موقع پر حکمراں پارٹی کے چیف وہپ نرمل گھوش نے اسمبلی میں بی جے پی اراکینِ اسمبلی کے خلاف تجویز پیش کرتے ہوئے کہا کہ ایوان کے وقار کو مجروح کیا گیا ہے۔ سوبھیندو ادھیکاری کے اکسانے پر اسمبلی میں ہنگامہ کیا جارہا ہے۔
ممتا بینرجی حکومت کی وزیر چندریما بھٹاچاریہ نے مطالبہ کیا کہ بی جے پی اراکینِ اسمبلی کو معطل کیا جائے، اسمبلی اسپیکر بمان بنرجی نے کہا کہ ایوان کے وقار کو ٹھیس پہنچی ہے۔ املاک کو جو نقصان پہنچا ہے ، اس کا حساب کیا جائے گا۔ اس کے بعد سوبھیندو ادھیکاری سمیت چار دیگر بی جے پی اراکینِ اسمبلی کو اسمبلی کی کارروائی سے معطل کردیا گیا۔
Absolute pandemonium in the West Bengal Assembly. After Bengal Governor, TMC MLAs now assault BJP MLAs, including Chief Whip Manoj Tigga, as they were demanding a discussion on the Rampurhat massacre on the floor of the house.
What is Mamata Banerjee trying to hide? pic.twitter.com/umyJhp0jnE
— Amit Malviya (@amitmalviya) March 28, 2022
دوسری جانب بی جے پی آئی ٹی سیل کے چیف امت مالویہ نے ایک ویڈیو ٹویٹ کرتے ہوئے لکھا کہ “مغربی اسمبلی میں بھگڈر، بنگال کے گورنر کے بعد ٹی ایم سی اراکینِ اسمبلی نے اب چیف وہپ منوج ٹگا کے ساتھ بی جے پی اراکینِ اسمبلی پر حملہ کیا، کیونکہ وہ ایوان میں رامپور ہاٹ قتل عام پر گفتگو کا مطالبہ کررہے تھے۔ ممتا بینرجی کیا چھپانا چاہتی ہیں؟”
