پاکستانی شوبز انڈسٹری کی معروف اداکارہ منال خان کا کہنا ہے کہ میں نے سوشل میڈیا کو کبھی بھی سنجیدہ نہیں لیا۔
غیر ملکی میڈیا کے یوٹیوب چینل پر پوسٹ کی گئی 2020 کی ویڈیو میں میزبان اداکارہ منال خان سے کہتے ہیں کہ سوشل میڈیا پر لوگ ذاتیات پر اتر آتے ہیں۔
اس پر منال خان کہتی ہیں کہ سوشل میڈیا کو کبھی سنجیدہ نہیں لیا اور نہ ہی لینا چاہتی ہوں کیوں کہ میرا خیال ہے کہ میری نجی زندگی ہے جو نجی ہی رہنی چاہیے۔
اداکارہ نے کہا کہ جو لوگ ہمیں پسند نہیں کرتے وہ اس بات کا اظہار کرتے ہیں اور پسند کرنے والے بھی کھل کر بتاتے ہیں، ہمیں پیار اور نفرت کو ایک جیسا لینا چاہیے۔
خیال رہے کہ منال خان پچھلے دنوں سوشل میڈیا پر موضوع بحث رہی ہیں۔ صارفین نے اداکارہ پر الزام عائد کیا تھا کہ انہوں نے امریکی ماڈل کیلی جنیر کی انسٹا گرام اسٹوری چوری کی ہے۔
دراصل منال خان نے اسٹوری میں جو تصویر لگائی تھی وہ اس سے قبل امریکی ماڈل کیلی جنیر اپنے انسٹا گرام پر شیئر کر چکی تھیں۔
کیلی جنیر اور منال خان کی انسٹا گرام اسٹوریز میں ایک جیسی تصویر ہے لیکن دونوں کا وقت مختلف ہے۔ امریکی ماڈل نے منال خان سے تقریباً تین گھنٹے قبل اسٹوری اپڈیٹ کی تھی جس سے معلوم ہوتا ہے کہ تصویر درحقیقت کیلی جنیر کی ہے۔
اس پر بہت زیادہ تنقید کے بعد منال خان نے بلآخر خاموشی توڑ دی اور سوشل میڈیا پر لکھا کہ ”یہ میرا انسٹا گرام اکاؤنٹ ہے، مجھے جو اچھا لگے گا وہ پوسٹ کروں گی”۔
”یہ میری زندگی ہے اور میں ویسے جیئوں گی جیسے مجھے پسند ہے، میرے پاس Pinterest اور دیگر ایپس ہیں، میں اس طرح کی تصاویر پسند کرتی ہوں اور ان کی پوسٹنگ جاری رکھوں گی“۔
اداکارہ نے آخر میں یہ بھی لکھا کہ ”اگر آپ کچھ کر سکتے ہو تو کرلو، مجھے اس کا انتظار رہے گا“۔
