اسلام آباد : وزارت خزانہ نے معاشی کارگردگی کی آؤٹ لک رپورٹ جاری کردی، جس میں ترسیلات زر میں تیرہ فیصد کمی ریکارڈ کی گئی اور خسارہ 2565 ارب روپے تک پہنچ گیا۔
تفصیلات کے مطابق وزارت خزانہ نے ماہ اپریل کی آؤٹ لک رپورٹ جاری کردی، جس میں بتایا گیا کہ خسارہ ، سرمایہ کاری، بڑی فصلوں اور بڑی صنعتوں کی پیداوار کم ہو گئی ہے۔
دستاویزات میں کہا گیا کہ دس ماہ میں وفاق کا خسارہ دوہزار پانچ سو پینسٹھ ارب روپے تک پہنچ گیا، سال دوہزار بائیس تئیس جولائی تااپریل ترسیلات زر میں تیرہ فیصد کمی ریکارڈ کی گئی۔
ترسیلات زرکاحجم 22.7 ارب ڈالررہا جو گزشتہ سال 26.1 ارب ڈالر تھی جبکہ جولائی تا اپریل برآمدات میں تیرہ اعشاریہ ایک فیصد کمی ریکارڈ کی گئی اور حجم تئیس اعشاریہ دو ارب ڈالر رہا۔
اسی طرح درآمدات میں 23 فیصد کمی ریکارڈ کی گئی ، حجم 45.2 ارب ڈالر رہیں جبکہ پہلے آٹھ ماہ میں جاری کھاتوں کے خسارے میں چھہتر اعشاریہ ایک فیصد کمی ہوئی اور جاری کھاتوں کے خساروں کا حجم 3.3 ارب ڈالر ریکارڈ کیا گیا۔
براہ راست غیرملکی سرمایہ کاری میں تئیس اعشاریہ دو فیصد کمی ہوئی، جس کے بعد براہ راست غیرملکی سرمایہ کاری ایک ارب ایک کروڑ ڈالر رہیں۔
