اسلام آباد: کراچی کو جدید خطوط پر استوار کرنے کے لئے وزارت بحری امور نے بڑا فیصلہ کیا ہے۔
تفصیلات کے مطابق میری ٹائم نے سی پیک کے تحت اقتصادی ٹرانسفارمیشن منصوبہ شروع کردیا ہے، جس کے تحت کراچی کوسٹل کمپرینسی ڈویلپمنٹ زون کو سی پیک فریم ورک میں شامل کرلیا گیا ہے۔
وزارت بحری امور کے مطابق منصوبے میں تین ارب پچاس کروڑ ڈالر سرمایہ کاری کی جائے گی، منصوبے کی تکمیل کیلئے چین براہ راست سرمایہ کاری کریگا۔
کے سی سی ڈی زیڈ ، بحری امور کی وزارت کا ایک اہم اقدام ہے جو کراچی کو ایک انتہائی جدید شہری انفراسٹرکچر زون فراہم کرنے پر مرکوز ہے، جس سے کراچی کو دنیا کے سرفہرست بندرگاہوں میں شامل ہوگا۔
سی پیک کے لیے اپنی نوعیت کے پہلے منصوبے میں ملٹی بلین ڈالر کا میگا کے سی سی ڈی زیڈ منصوبہ کے پی ٹی کے ساتھ شراکت میں براہ راست چینی سرمایہ کاری پر بنایا جائے گا۔ منصوبے کے لیے متوقع سرمایہ کاری تقریبا 3.5 بلین ڈالر ہے۔ کے سی سی ڈی زیڈ نہ صرف پاکستان بلکہ پورے خطے کے لیے ایک اہم منصوبہ ہوگا۔ کم لاگت کے گھروں کو فروغ دینے کے لیے وزیراعظم عمران خان کے وژن کے مطابق کے سی سی ڈی زیڈ آس پاس کی کچی آبادیوں میں رہنے والے 20 ہزار سے زائد خاندانوں کو رہائشی آبادکاری بھی فراہم کرے گا۔
رپورٹ کے مطابق ماحول دوست میگا کے سی سی ڈی زیڈ کے پی ٹی کے لیے 4 نئی برتھوں کو تعمیر کرے گا جو پاکستان کے بڑھتے ہوئے سمندری شعبے میں معاون ثابت ہوگا۔ یہ ایک جدید ترین ماہی گیری بندرگاہ بھی بنائے گا، جس میں پاکستان کی تجارتی صلاحیت کو بڑھانے کے لیے عالمی معیار کا فشریز ایکسپورٹ پروسیسنگ زون ہوگا۔ اس سے سمندری ماحولیاتی نظام میں بھی بہتری آئے گی اور دریائے لیاری پر واٹر ٹریٹمنٹ پلانٹ لگا کر آلودگی کو کم کیا جائے گا۔
کے سی سی ڈی زیڈ کراچی کے باقی حصوں سے پاکستان کے ڈیپ واٹر پورٹ سے نکلنے والے ایک پل کے ذریعے، منوڑا جزائر اور سینڈز پٹ بیچ کے لیے رابطہ قائم کرے گا۔ کے سی سی ڈی زیڈ عالمی سرمایہ کاروں کے لیے بھی بہت معاون ثابت ہوگا۔ کے سی سی ڈی زیڈ پاکستان کی بلیو اکانومی کے راستے کھولے گا اور دونوں برادر ممالک کے درمیان ترقی اور صنعتی تعاون کو نمایاں طور پر بڑھا دے گا۔
