لاہور: صوبہ پنجاب کے شہر ملتان کی زرعی یونیورسٹی کے ماہرین نے ایسے پھل کی فصل کاشت کی ہے جو سیب اور بیر کی خصوصیات رکھتا ہے۔
تفصیلات کے مطابق ملتان کی زرعی یونیورسٹی کے ہارٹی کلچر ڈپارٹمنٹ کے اسسٹنٹ پروفیسر ڈاکٹر سمیع اللہ نے اے آر وائی نیوز کے مارننگ شو باخبر سویرا میں شرکت کی اور اس تجربے کے بارے میں بتایا۔
ڈاکٹر سمیع اللہ کا کہنا ہے کہ یہ پھل بنیادی طور پر تھائی لینڈ میں پایا جاتا ہے، انہوں نے اس پھل کے بیچ منگوا کر مقامی بیر میں اس کی گرافٹنگ کی جس کے بعد یہ فصل تیار ہوئی۔
اس پھل کا ذائقہ میٹھا اور ترش ہے، یہ شوگر فری ہے اور اس میں بیج بھی نہیں ہے۔
یہ پھل معدے اور دیگر امراض سے بچاؤ کی خاصیت بھی رکھتا ہے۔
ڈاکٹر سمیع اللہ کا کہنا ہے کہ مقامی بیر خود بھی اپنے اندر بہت سے فوائد رکھتا ہے لیکن زیادہ مقبول نہیں، اب یہ پھل اپنے ذائقے کی وجہ سے عوامی طور پر مقبول ہوسکتا ہے اگر تجارتی بنیادوں پر اس کی کاشت کی جائے۔
