کراچی: شہر قائد میں موبائل فون پر دوستی کے بعد شادی کا فلمی ڈراپ سین سامنے آیا ہے، لڑکی زیور اور نقدی لے کر گھر سے فرار ہوگئی۔
تفصیلات کے مطابق شہر قائد میں ایک نوجوان کی خاتون کے ساتھ موبائل فون پر دوستی ہوئی جس کے بعد دونوں شادی پر رضا مند ہوئے اور پھر انہوں نے شادی بھی کی تاہم اب اس کا فلمی ڈراپ سین سامنے آیا۔
شوہر کے مطابق بیوی نے ایک رات فون کر کے جلدی گھر آنے کا کہا اور جب میں گھر پہنچا تو دروازے پر تالا لگا ہوا تھا، جس پر میں نے اہلیہ کو فون کیا تو اُس کا موبائل بند تھا۔
شوہر کا کہنا ہے کہ انہوں نے گھر میں داخل ہوکر دیکھا تو الماری اور درازیں کھلی ہوئی تھیں اور اُن میں سے سامان باہر نکلا پڑا تھا۔ شوہر کے مطابق اہلیہ گھر سے اہم دستاویزات، ایک لاکھ روپے کے زیورات لے کر غائب ہوئی۔
شوہر نے متعلقہ تھانے میں مقدمے درج کرنے کے لیے درخواست دائر کی جس میں یہ بھی بتایا گیا کہ فرار ہونے سے ایک روز قبل اُس کی اہلیہ نے دونوں کے موبائل سے تمام تصاویر ڈیلیٹ کردی تھیں۔ درخواست میں بتایا گیا کہ دونوں نے دسمبر میں کورٹ میرج کی اور دو ماہ ساتھ رہنے کے بعد فروری میں لڑکی سامان لے کر فرار ہوگئی۔
