نئی دہلی: مودی سرکار کی ایک اور بے شرمی سامنے آ گئی ہے، اپنا اور اپنے ملک کا نام شرم سے جھکانے والے پائلٹ کے لیے اعلیٰ ترین اعزاز کا اعلان کر دیا۔
تفصیلات کے مطابق مودی سرکار نے پائلٹ ابھی نندن کو اعلیٰ ترین فوجی اعزاز ویر چکرا دینے کا اعلان کر دیا ہے، ابھی نندن نے پاکستان پر فضائی حملے کی ناکام کوشش میں اپنا اور اپنے ملک کا نام شرم سے جھکا دیا تھا۔
ونگ کمانڈر ابھی نندن کے لیے اعلیٰ اعزاز کے اعلان کے بعد یہ نازک سوال اٹھا ہے کہ کیا بھارت میں اعزاز کا پیمانہ یہ ہے کہ اپنے طیارے کو پاکستان میں نشانہ بنوایا جائے۔
خیال رہے کہ بھارتی فضائیہ کے پائلٹ ابھی نندن ورتھمان نے 27 فروری کو پاکستان میں در اندازی کی کوشش کی تھی مگر پاک فضائیہ نے فوری کارروائی کرتے ہوئے ابھی نندن کے مگ 21 طیارے کو تباہ کر کے اسے گرفتار کر لیا تھا۔
یہ بھی پڑھیں: بھارت ابھی نندن کو ایوارڈ دے کر جھوٹ کو سچ ثابت نہیں کرسکتا: میجر جنرل آصف غفور
ابھی نندن کو بعد ازاں وزیر اعظم عمران خان کے حکم پر جذبہ خیر سگالی کے تحت رہا کر دیا گیا تھا۔
خیال رہے کہ اپریل کے مہینے میں ابھی نندن کے لیے فوجی اعزاز اشوک چکرا کا اعلان کیا گیا تھا، جس پر ڈی جی آئی ایس پی آر نے رد عمل دیتے ہوئے کہا تھا کہ ہر بار جھوٹ دہرانے سے وہ سچ نہیں بن جاتا، ابھی نندن سچا اور پیشہ ور سپاہی ہے، جعلی ایوارڈ وصول نہیں کرے گا۔
میجر جنرل آصف غفور نے ٹویٹ کرتے ہوئے کہا تھا کہ ’جس طرح بار بار جھوٹ بولنے سے وہ سچ نہیں بن جاتا اسی طرح ایوارڈ دینے سے بھی یہ ’بہادری‘ سچ نہیں بن جائے گی۔
