سابق پاکستانی فاسٹ بولر محمد آصف نے قومی ٹیم کے ورلڈ کپ 2023 کے اسکواڈ میں شامل کئے گئے وہ کھلاڑی جنہوں نے ایشیا کپ میں قوم کو مایوس کیا، ان کے انتخاب پر شدید تنقید کی۔
پاکستان کرکٹ بورڈ (پی سی بی) نے ورلڈ کپ 2023 کے لیے 15 رکنی اسکواڈ کا اعلان کر دیا ہے جس میں فاسٹ بولر نسیم شاہ کو ڈراپ کر دیا گیا ہے، جب کہ آل راؤنڈر شاداب خان کو ایشیا کپ 2023 کی مایوس کن کارکردگی کے باوجود اسکواڈ میں منتخب کیا گیا ہے۔
ایشیا کپ 2023 کے دوران، 24 سالہ آل راؤنڈر شاداب صرف چھ وکٹیں حاصل کرنے میں کامیاب رہے – ان میں سے چار وکٹیں انہوں نے نیپال کے خلاف میچ میں حاصل کی تھیں، جبکہ ٹورنامنٹ کے پانچ میچز میں انہوں نے صرف 13رنز بنائے، محمد نواز اور آغا سلمان نے بھی مایوس کن کارکردگی کا مظاہرہ کیا تھا۔
میڈیا رپورٹس میں پیش گوئی کی گئی تھی کہ ان کھلاڑیوں کی مایوس کن کارکردگی کے باعث انہیں ورلڈ کپ اسکواڈ میں شامل نہیں کیا جائے گا مگر حیرت انگیز طور پر شاداب خان اور آغا سلمان اپنی جگہ برقرار رکھنے میں کامیاب رہے۔
ٹیم کے اعلان کے بعد سابق پاکستانی فاسٹ بولر محمد آصف نے آغا سلمان کے انتخاب پر کڑی تنقید کرتے ہوئے کہا کہ وہ انہیں کھلاڑی بھی نہیں مانتے۔
محمد آصف نے کہا کہ آغا سلمان صرف اس وقت سکور کرتے ہیں جب پاکستان پہلے ہی ایک ٹیم کے طور پر اچھی پوزیشن میں ہو، انہوں نے آغا سلمان کو وقت کا ضیاع قرار دیا۔
پاکستان کے موجودہ پیس اٹیک کے بارے میں بات کرتے ہوئے سابق پاکستانی فاسٹ باؤلر محمد آصف نے اپنی رائے کا اظہار کرتے ہوئے کہا کہ ‘ورلڈ کپ اسکواڈز میں منتخب باؤلرز اوسط درجے کے ہیں، کوئی خاص نہیں ہے۔
