نئی دہلی: بھارت کرکٹ ٹیم کے سابق کھلاڑی محمد کیف کو مینز بلائنڈ قومی ٹی ٹوئنٹی کرکٹ ٹورنامنٹ کا برانڈ ایمبیسڈر مقرر کردیا گیا۔
بھارتی میڈیا رپورٹ کے مطابق سابق بھارتی کھلاڑی محمد کیف کو بھارت کے مینز بلائنڈ کرکٹ ٹیم کا ایک برانڈ اور خیر سگالی سفیر مقرر کیا ہے، ان کا مقصد بھارت میں بلائنڈ کرکٹ کے لیے کام کرنا ہے۔
بھارتی بورڈ کا کہنا ہے کہ محمد کیف اور ناگیش ٹرافی کے درمیان یہ وابستگی بھارت میں بلائنڈکرکٹرز کی کامیابیوں کو اجاگر کرنے کی جانب ایک اہم قدم ثابت ہوگا۔
کیف کی میں نہ مانوں کی رٹ برقرار، وارنر سے بات منوانے کے لیے اڑ گئے
اس حوالے سے محمد کیف نے کہاکہ میں ناگیش ٹرافی کے ساتھ منسلک ہونے پر فخر اور خوشی محسوس کر رہا ہوں، نابینا افراد کے لیے کرکٹ ایک متاثر کن آئیڈیا ہے اور کھلاڑیوں کی لگن اور صلاحیت قابل تعریف ہے اور میں نابینا کھلاڑیوں کے لیے کرکٹ کی حمایت کرتا ہوں۔
انہوں نے کہا کہ میں بھارت میں نابینا افراد کے لیے کرکٹ کے فروغ میں تعاون کا منتظر ہوں اور ان کے ناقابل یقین سفر کا حصہ بننا چاہتا ہوں۔
واضح رہے کہ ناگیش ٹرافی 23 نومبر سے 30 جنوری 2024 تک منعقد ہوگی۔ لیگ مرحلہ 29 دسمبر تک کھیلا جائے گا جبکہ سپر 8 مرحلے کے میچ جنوری 2024 میں ناگپور، مہاراشٹر میں کھیلے جائیں گے۔
