متحدہ قومی موومنٹ پر پابندی کے حق میں نہیں ہوں، عمران خان -
The news is by your side.

Advertisement

متحدہ قومی موومنٹ پر پابندی کے حق میں نہیں ہوں، عمران خان

اسلام آباد : پاکستان تحریک انصاف کے چیئرمین عمران خان نے کہا ہے کہ میں اختلافات کے باوجود میں ایم کیو ایم پر پابندی کے حق میں نہیں ہوں۔

ایم کیو ایم میں محب وطن اور پڑھے لکھے لوگ آج بھی ہیں، لہٰذا ایسے لوگوں کو بھی آگے آنا چاہئیے.

ان خیالات کا اظہار انہوں نے اے آر وائی کے پروگرام الیونتھ آور میں میزبان وسیم بادامی سے خصوصی بات چیت کرتے ہوئے کیا۔


پی ایس پی سے مستقبل میں اتحاد ہوسکتا ہے

عمران خان کا کہنا تھا کہ مصطفیٰ کمال کی آمد خوش آئند ہے، مستقبل میں پی ایس پی سے اتحاد ہو سکتا ہے، متحدہ قومی موومنٹ دہشت گرد اور نواز لیگ معاشی دہشت گرد جماعت ہے۔

فاروق ستار اورالطاف حسین کا میچ فکس ہے

ان کا کہنا تھا کہ ڈاکٹر فاروق ستار اورالطاف حسین کا معاملہ میچ فکسنگ لگتا ہے، فاروق ستار اپنے قائد کا ساتھ کبھی نہیں چھوڑیں گے۔ لیکن وہ مجبور بھی ہیں۔ عمران خان نے دعویٰٰ کیا کہ کراچی تو تحریک انصاف کا ہی شہر ہے۔

 پی ٹی وی پر حملہ ہم نے نہیں کروایا

انہوں نے کہا کہ بیس سال میں کبھی توڑ پھوڑ کی سیاست نہیں کی، پی ٹی وی کی عمارت پر حملہ ہم نے نہیں کرایا، سرکاری ٹی وی پر حملہ ہوا تو کنٹینر پر کھڑے ہوکر کہا تھا کہ واپس آجاؤ۔ مجھے شک ہے کہ یہ حملہ حکومت نے خود کروایا تھا۔

فیصل واوڈا پر حملے کا الزام فی الحال کسی پر نہیں لگا سکتے

پی ٹی آئی رہنما فیصل واوڈا کی گاڑی پر حملے کے حوالے سے عمران خان کا کہنا تھا کہ حملے کا الزام بغیر کسی ثبوت کے کسی پر نہیں لگا سکتے، ان پر حملہ ہم کو ڈرانے کی کوشش ہے۔

فیصل واوڈا نیب کے دفتر میں کچھ ثبوت دینے کیلئے گئے تھے، ہوسکتا ہے حملے کے محرکات پانامہ لیکس کے حوالے سے ہوں یا پھر وہ عناصر جو شہر میں امن و امان کو تباہ کرنا چاہتے ہیں، لیکن اس پر کچھ واضح طور پر نہیں کہا جاسکتا۔


بارہ مئی کا ذمہ دار وسیم اختر نہیں الطاف حسین اور مشرف ہیں 

ایک سوال کے جواب میں عمران خان نے کہا کہ سانحہ بارہ مئی کا مقدمہ وسیم اختر پر نہیں بلکہ الطاف حسین اور اس وقت کے صدر پرویزمشرف پر قائم کیا جانا چاہیئے۔ انہوں نےکہ الطاف حسین برطانوی شہری ہیں اور حکومت کو چاہیئے کہ پاکستان میں شر انگیزی پھیلانے جرم میں ان کو جیل میں ڈلوائے۔

انہوں نے کہا کہ پاکستان کی فارن پالیسی نہ ہونے کے برابر ہے، انہوں نے کہا کہ کراچی کے ضلع غربی کے بلدیاتی انتخابات میں ایم کیو ایم کے ساتھ اتحاد پر افسوس ہے۔

چیئرمین پی ٹی آئی کا کہنا تھا کہ صوبہ خیبر پختونخواہ میں جرائم کی شرح دوسرے صوبوں کے مقابلے میں سب سے کم ہے، اگر رینجرز کو ضرورت ہے تو وہ جرائم پیشہ افراد کیخلاف ضرور آپریشن کرے۔

 

 

Comments

comments

یہ بھی پڑھیں