دبئی : ٹی ٹوینٹی ورلڈ کپ کے سب سے اہم میچ میں جارحانہ بیٹنگ کرنے والے محمد رضوان نے آئی سی سی کو بھی اپنا گرویدہ بنالیا۔
محمد رضوان نے پریکٹس میں جو انداز اپنایا، دبئی میں بھارت کیخلاف اسی انداز سے شاندار کھیل کا مظاہرہ کرکے دکھایا۔ آئی سی سی نے محمد رضوان کی پریکٹس اور میچ کی بیٹنگ کی ایک ساتھ ویڈیو شئیر کردی۔
مسلسل محنت سے اپنے کھیل میں نکھار لانے والے وکٹ کیپر بیٹسمن محمد رضوان نے بھارت کیخلاف تاریخی فتح میں کلیدی کردار ادا کیا جس کی پذیرائی انٹرنیشنل کرکٹ کونسل نے ایک انوکھی ویڈیو شیئر کرکے کی۔
آئی سی سی نے ٹوئٹراکاؤنٹ پر جاری اس پوسٹ کے کیپشن میں لکھا کہ خواب دیکھنے سے تصور کرنے اور پھر اس کی تعبیر پانے تک۔
Dream. Visualise. Execute.
Mohammad Rizwan’s masterpiece started before a ball was bowled 🎨#T20WorldCup #INDvPAK pic.twitter.com/o4m8biFhdP
— ICC (@ICC) October 25, 2021
ویڈیو میں دیکھا جاسکتا ہے کہ رضوان نے میچ سے قبل جیسی پریکٹس کی ویسا ہی کھیل بھی دکھایا آئی سی سی نے پریکٹس اور میچ کی مشترکہ ویڈیو شئیر کی جو سوشل میڈیا پر خوب وائرل ہورہی ہے۔
پاکستان نے ورلڈ کپ ایونٹ میں دہائیوں کے بعد بھارت کو شکست دیکر تاریخ رقم کردی ہے، باؤلر نے جہاں بھارتی بلے بازوں کو باندھ کر رکھا وہیں پاکستانی اوپنرز نے بھارتی سورماؤں کو شکست کی دھول چٹادی۔
اس میچ میں اکیلے یہی ریکارڈ نہیں ٹوٹا بلکہ محمد رضوان اور کپتان بابر اعظم کی میچ وننگ اوپنر پارٹنر شپ نے بھی ریکارڈ ساز سنگ میل عبور کیا۔
اس بہترین پرفارمنس پر دنیا بھر سے محمد رضوان اور بابر اعظم کے لیے تہنیتی پیغامات موصول ہورہے ہیں لیکن کرکٹ کی دنیا کے سرخیل ادارے آئی سی سی نے محمد رضوان کی ایک حیران کن ویڈیو شیئر کی ہے۔
ویڈیو میں دیکھا جا سکتا ہے کہ میچ سے قبل بلا تھامے محمد رضوان ہوا میں شاٹس کی پریکٹس کررہے ہیں، اس پریکٹس کے دوران رضوان نے جس جس انداز سے شاٹس کھیلے بالکل اسی انداز سے بھارتی باؤلرز کی گیندوں کو پویلین سے باہر پھینکا۔
