لاہور : سابق وزیراعلیٰ پنجاب سردار عثمان بزدار کیخلاف قومی احتساب بیورو نے تحریک انصاف اور سیاست چھوڑنے کے اعلان کے باوجود گھیرا مزید تنگ کردیا۔
اس حوالے سے ذرائع کا کہنا ہے کہ نیب نے عثمان بزدار کے دور حکومت میں پنجاب میں ہونے والی تقرری و تبادلوں کی تحقیقات کا آغازکردیا ہے۔
ذرائع کے مطابق نیب لاہور نے کارروائی کا آغاز کرتے ہوئے سیکرٹری سروسز پنجاب سے تقرری و تبادلوں سے متعلق مکمل ریکارڈ طلب کرلیا ہے۔
نیب ذرائع کا کہنا ہے کہ سیکرٹری مواصلات کو5 جون کو ریکارڈ پیش کرنے کی ہدایت کی گئی تھی،
تاہم سیکرٹری مواصلات نے تاحال ریکارڈ فراہم نہیں کیا ہے۔
ذرائع کے مطابق عثمان بزدار دور میں افسران کے تقرری و تبادلوں پر کروڑوں روپے رشوت کا الزام ہے، تبادلوں میں فرحت شہزادی عرف فرح گوگی، سابق پرنسپل سیکرٹری طاہرخورشید بھی ملوث ہیں۔
واضح رہے کہ گزشتہ روز سابق وزیراعلیٰ پنجاب عثمان بزدار نے 9 مئی کے واقعات کی مذمت کرتے ہوئے سیاست سے دستبردار ہونے کا اعلان کیا تھا۔
کوئٹہ میں پریس کانفرنس کرتے ہوئے انہوں نے کہا کہ ہم نے ہمیشہ شرافت کی سیاست کی ہے۔ پاک فوج کے ساتھ کھڑے ہیں اور کھڑے رہیں گے، انہوں نے اعلیٰ حکام سے اپیل کی کہ بے گناہ لوگوں کو رہا کیا جائے۔
سابق وزیراعلیٰ پنجاب کا کہنا تھا کہ 3 سال 7 ماہ صوبے کے عوام کی خدمت کی اور اس حوالے سے میرا ضمیر مطمئن ہے۔ 14 ماہ سے اپنے خلاف مقدمات کا سامنا کر رہا ہوں۔
