پیرس: بین الاقوامی فلکیاتی یونین نے نئے دریافت شدہ ستاروں اور ان کے سیاروں کے ناموں کا باضابطہ اعلان کردیا۔
بین الاقوامی میڈیا رپورٹس کے مطابق فلکیاتی یونین (آئی اے یو) نے صد سالہ تقریبات کے سلسلے میں فرانس کے دارالحکومت پیرس میں منعقدہ پریس کانفرنس میں نئے ستاروں اور سیاروں کے ناموں کا اعلان کیا۔
یونین کو نئے دریافت شدہ 112 سیاروں اور ان کے میزبان ستاروں کے ناموں کے حوالے سے 3 لاکھ 60 ہزار تجاویز موصول ہوئیں اور 4 لاکھ 20 ہزار ووٹوں کے بعد ناموں کو شارٹ لسٹ کیا گیا۔
پاکستان سے رائے شماری میں حصے لینے والے افراد کی جانب سے شمع اور پروانہ ناموں کا انتخاب کیا گیا جسے منظور کر لیا گیا۔
ایک ستارے کا نام ’شارجہ‘ رکھا گیا ہے اور اس کے نمائندہ سیارے کو برجیل کا نام دیا گیا ہے۔
یونین نے متحدہ عرب امارات کی سائنسی دنیا میں گراں قدر خدمات پر امارات اسلامیہ کی ستائش کی اور ان کی کوشش کے اعتراف میں ایک ستارے کو ’شارجہ‘ کے نام سے منسوب کردیا گیا۔
