واشنگٹن: نینسی پلوسی کے شوہر پر ہتھوڑے سے حملے کے معاملے پر امریکی صدر نے کہا ہے کہ سیاست میں نفرت آمیز حملے برداشت نہیں کیے جائیں گے۔
امریکی میڈیا کے مطابق صدر جو بائیڈن نے امریکی ایوانِ نمائندگان کی اسپیکر نینسی پلوسی کے شوہر پر حملے کی شدید مذمت کی ہے، انھوں نے کہا کہ سیاست میں نفرت آمیز حملے برداشت نہیں کیے جائیں گے۔
سان فرانسسکو میں حملہ آور نے صبح کے وقت گھر میں گھس کر پال پلوسی پر ہتھوڑے سے حملہ کیا تھا، امریکی میڈیا کے مطابق 82 سالہ پال پلوسی کی حالت خطرے سے باہر ہے۔
حملے کی خبر آنے کے بعد نینسی پلوسی واشنگٹن سے سان فراننسکو پہنچ گئی ہیں، دوسری طرف حملہ آور پولیس کی حراست میں ہے اور اس سے تفتیش جاری ہے۔
اسپیکر امریکی ایوان نمائندگان نینسی پلوسی کے شوہر پر قاتلانہ حملہ
بی بی سی کے مطابق اسپیکر نینسی پلوسی کے شوہر پال پلوسی حملے کے بعد سرجری سے صحت یاب ہو رہے ہیں، ہتھوڑے سے مارے جانے کی وجہ سے ان کی کھوپڑی کی ہڈی ٹوٹ گئی تھی، اور ان کے دائیں بازو اور ہاتھ پر شدید چوٹیں آئیں۔
حملہ آور نے گھر میں گھسنے کے بعد نینسی پلوسی سے ملنے کا مطالبہ کیا تھا۔
صدر جو بائیڈن نے اس حملے کو سیاسی تناظر میں دیکھا اور اسے ’قابل نفرت‘ قرار دیا۔ حملے کے وقت نینسی پلوسی واشنگٹن ڈی سی میں تھیں، وہ اپنے شوہر کو اسپتال میں دیکھنے کے لیے واپس چلی گئیں۔
