نئی دہلی : نریندر مودی کے بادلوں پر مضحکہ خیز بیان کے بعد سوشل میڈیا پر بھارتی وزیر اعظم کا خوب مذاق بن رہا ہے، ایک صارف نے کہا کہ ٹیلی فون کی ایجاد سے قبل گراہم بیل کے پاس مودی کی تین مسڈ کالیں آئی ہوئی تھیں۔
گزشتہ روز بھارتی وزیر اعظم نریندر مودی کا بادلوں کے حوالے سے مضحکہ خیز بیان کے بعد ان پر طنز کا سلسلہ تاحال جاری ہے، سوشل میڈیا پر صارفین طرح طرح کے جملے کس رہے ہیں۔
مودی پر تنقید کے گہرے بادل اس قدر چھائے ہوئے ہیں کہ طنز کی بارش ہے جو رکنے کا نام ہی نہیں لے رہی، مودی کے اس بیان نے فزکس کے طالب علموں کو بھی چکرا کر رکھ دیا ہے، فزکس کہتی ہے موسم جتنا بھی خراب ہو طیارہ ریڈار پر آ ہی جاتا ہے۔
سوشل میڈیا پر مودی کی پرکاش سنگھ بادل کے ساتھ تصویر لگا کر کہا جارہا ہے کہ مودی بادل کے ساتھ ریڈار سے بچنے کی ڈیل کر رہے ہیں۔
کسی نے ٹویٹ کیا کہ مودی نے طیاروں کو ریورس گیئر میں جانے کا کہا تھا تاکہ پاکستان کو پتہ نہ چلے کہ طیارے آرہے ہیں یا جارہے ہیں، ایک ٹویٹر صارف نے تو مودی جی کو ناسا کی طرف سے کلاؤڈ مینجمنٹ کا سرٹیفکیٹ بھی دے دیا۔
ایک صارف نے طنز کیا کہ گراہم بیل نے جب ٹیلی فون ایجاد کیا تو ا س کے پاس مودی کی تین مسڈ کالز پہلے سے آئی ہوئی تھیں، یاد رہے کہ سوشل میڈیا پر شدید تنقید کے بعد بی جے پی کے ٹویٹر اکاؤنٹ سے مودی کا بیان ہی ڈیلیٹ کردیا گیا ہے۔
