یہ تذکرہ ہے ناصر خان کا جنھوں نے قیامِ پاکستان کے بعد یہاں بننے والی پہلی فلم تیری یاد میں بطور اداکار کام کیا تھا۔ وہ عظیم اداکار اور بولی وڈ کے شہنشاہِ جذبات دلیپ کمار کے بھائی تھے۔
ناصر خان تقسیمِ ہند کے بعد لاہور آگئے۔ پاکستان میں انھوں نے بطور اداکار فلمی دنیا میں قدم رکھا۔ تیری یاد 1948ء میں ریلیز ہوئی تھی۔ اس کے اگلے سال انھوں نے فلم شاہدہ میں کام کیا اور یہ دونوں فلمیں ناکام رہیں۔ ناصر خان نے 1951ء میں اچانک بھارت جانے کا فیصلہ کرلیا۔ وہاں انھوں نے ممبئی کی فلمی دنیا سے وابستگی اختیار کی۔ ممبئی میں نگینہ اُن کی پہلی فلم تھی۔ اس فلم میں وہ نوتن کے ساتھ نظر آئے۔ یہ بولی وڈ کی کام یاب ترین فلم تھی۔ اداکارہ کے ساتھ ان کی چند مزید فلمیں ریلیز ہوئیں جن میں آغوش اور شیشم شامل ہیں۔ ناصر خان نے اپنے بھائی دلیپ کمار کے ساتھ بھی گنگا جمنا نامی فلم میں اداکاری کے جوہر دکھائے۔ اس فلم کے بعد وہ 1970ء تک اسکرین سے دور رہے اور پھر یادوں کی بارات جیسی فلم سے چھوٹے موٹے کردار نبھانے کا آغاز کیا۔ ناصر خان کی آخری فلم بیراگ تھی جو 1976ء میں ان کی موت کے بعد ریلیز ہوئی۔
ناصر خان غلام سرور علی خان اور عائشہ بیگم کی اولاد تھے۔ وہ 11 جنوری 1924 کو پیدا ہوئے۔ ناصر خان اپنے بھائی دلیپ کمار سے عمر میں دو سال چھوٹے تھے۔ اداکار ناصر خان کی پہلی شادی ثریا نذیر سے ہوئی تھی جو لیجنڈری فلم میکر نذیر احمد خان کی بیٹی تھیں۔ اللہ نے انھیں ایک بیٹی سے نوازا جس کا نام انھوں نے ناہید خان رکھا۔ ناصر خان نے اپنے وقت کی مشہور اداکار بیگم پارہ سے دوسری شادی کی اور ان کے بطن سے ایک بیٹے کے باپ بنے۔ ان کا بیٹا ایوب خان بھی اداکار بنا۔
3 مئی 1974ء میں ناصر خان پچاس سال کی عمر میں وفات پاگئے۔