کراچی: قومی ایوی ایشن پالیسی 2023 کے اہم نکات سامنے آ گئے ہیں۔
تفصیلات کے مطابق قومی ایوی ایشن پالیسی 2023 کے تحت پاکستان میں رجسٹرڈ طیاروں کے حادثوں کی تحقیقات ایئر کرافٹ ایکسیڈنٹ انویسٹی گیشن بورڈ کرے گا۔
ایوی ایشن پالیسی کے متن کے مطابق اے اے آئی بی پاکستان میں کام کرنے والے کسی بھی سول ہوائی جہازوں کی تحقیقات کا مجاز ہے، تاہم بیرون ملک پاکستانی رجسٹرڈ جہاز کی تحقیقات وزرات ہوا بازی کی اجازت سے مشروط ہوگی۔
طیارہ حادثے والے ممالک کی ریاست کی جانب سے درخواست پر بھی تحقیقات کی جا سکے گی، کسی بھی طیارہ حادثے کی تحقیقات ایک مخصوص وقت میں مکمل کی جائے گی، تحقیقات کے بعد سفارشات کو تمام اسٹیک ہولڈرز کے ساتھ شیئر کیا جائے گا۔
سفارشات کے ذریعے مستقبل میں حادثات سے بچنے اور مربوط انداز پر عمل پیرا ہونے میں مدد ملے گی، جب کہ مرتب کردہ سفارشات پر عمل درآمد کا وزارت ہوا بازی وقتاً فوقتاً جائزہ لے گی۔
