راولپنڈی:اینٹی نارکوٹکس فورس نے ملک گیر کارروائیاں کرتے ہوئے بھاری مقدار میں منشیات برآمد کرلی، جبکہ 4ملزمان کو حراست میں لے لیا گیا۔
اے این ایف ترجمان کے مطابق ٹول پلازہ گوجرانوالہ کے قریب گاڑی سے93 کلو سے زائد چرس برآمد کرلی گئی جبکہ 2ملزمان کو حراست میں لے لیا گیا، منشیات گاڑی کے خفیہ خانوں میں چھپائی گئی تھی۔
ترجمان کے مطابق کچلاک بائی پاس کوئٹہ کے قریب برساتی نالے میں چھپائی گئی50 کلوہیروئن برآمد کرلی گئی، جبکہ خیبر کے ضلع جروبی زخاخیل کے قریب پلاسٹک کے تھیلوں میں چھپائی گئی 8 کلو چرس برآمد کرلی گئی۔
میانوالی میں موٹرسائیکل سوارکو حراست میں لے کر 1کلو سے زائد افیون، 40 گرام چرس برآمد کی گئی جبکہ پاکستان انٹرنیشنل کنٹینرٹرمینل، کراچی میں کارروائی کے دوران5کلوگرام آئس برآمد کرلی گئی۔
مذکورہ کنٹینر پشاور کی نجی کمپنی کی جانب سے آسٹریلیا کیلئے بک کیا گیا تھا، منشیات کنٹینر میں ڈیکوریشن پیسز پرمشتمل 14عددڈرموں میں چھپائی گئی تھی۔
ترجمان کے مطابق پاک افغان بارڈر چمن پر کارروائی کے دوران ملزم کے بیگ سے 4کلو مشکوک مواد برآمد کرلیا گیا، ملزمان کیخلاف انسدادمنشیات ایکٹ کے تحت مقدمات درج کرکے تحقیقات کا آغاز کردیا گیا ہے۔
