لاہور: سابق وزیراعظم نوازشریف کو ملنے والی چھ ہفتوں کی ضمانت آج ختم ہورہی ہے اور قوائد کے مطابق انہوں نے خود کو جیل حکام کے حوالے کرنا ہے، جیل حکام کے مطابق وہ شام پانچ بجے تک آسکتے ہیں۔
تفصیلات کے مطابق قید ی نمبر 4470 میاں محمد نواز شریف کی مدت ضمانت آج ختم ہورہی ہے اور جیل حکام کا کہنا ہے کہ قانون کے مطابق انہیں شام 5 بجے تک جیل پہنچ جانا چاہیے، چھ بجے قیدیوں کی گنتی مکمل کرلی جاتی ہے۔
دوسری جانب میاں نواز شریف کا ارادہ ہے کہ وہ ریلی کی شکل میں شام ساڑھے سات بجے کوٹ لکھپت جیل کی جانب روانہ ہوں گے جس کی قیادت مریم نوازشریف کریں گی ، اور اندازاً یہ ریلی رات دس بجے تک جیل پہنچے گی ۔
جیل حکام نے مزید بتایا ہے کہ تاخیر سے آمد محکمہ داخلہ کی منظوری سے مشروط ہے ، اگر محکمہ داخلہ اس کی اجازت دے دیتاہے، جیل حکام نے پولیس کے اعلیٰ حکام کو نواز شریف کی منتقلی کے عمل کے بارے میں آگاہ کردیا ہے۔
ذرائع کا کہنا ہے کہ نواز شریف کی آمد کے موقع پر کوٹ لکھپت میں ان کے سیل کی صفائی ستھرائی بھی کی گئی ہے، وہاں نئے پردے نصب کیے گئے ہیں، ٹھنڈے پانی کے کولر کا بھی انتظام کیا گیا ہے۔
آئی جی جیل خانہ جات نےجیل منتقلی سےمتعلق اعلیٰ حکام کوآگاہ کردیا ، نواز شریف رات10بجےخودکوجیل حکام کےحوالےکریں گے۔نواز شریف کی 6بجے کےبعدجیل منتقلی کامعاملہ محکمہ داخلہ کی منظوری سےمشروط ہے ، پولیس کو نواز شریف کی رات کوجیل منتقلی سے آگاہ کردیاگیا۔افطارکےبعدرات 8بجے پولیس کی نفری جیل کےباہر تعینات کی جائے گی۔
دوسری جانب مسلم لیگ ن کی جانب سے لاہور کے ڈپٹی کمشنر کو بذریعہ خط نواز شریف کی جیل واپسی ریلی کے بارے میں آگاہ کردیا۔ خط کے مطابق نواز شریف شام ساڑھے سات بجے جاتی امرا سے روانہ ہوں گے ۔ خط میں پنجاب حکومت سے مکمل سیکیورٹی کا مطالبہ کیا گیا ہے۔
