The news is by your side.

Advertisement

امریکی صدر کی پیشکش ٹھکرا کر ایٹمی دھماکے کیے‘ نوازشریف

اسلام آباد : مسلم لیگ ن کے قائد نوازشریف کا کہنا ہے کہ ملک میں صرف میرا ہی احتساب ہورہا ہے، پاناما میں شامل 400 لوگوں کے خلاف کوئی کارروائی ہوئی؟۔

تفصیلات کے مطابق وفاقی دارالحکومت اسلام آباد میں سابق وزیراعظم نوازشریف کی زیرصدار عوامی نمائندوں کا اجلاس ہوا جس میں شہبازشریف، مریم نوازاور حمزہ شہبازسمیت دیگررہنماؤں نے شرکت کی۔

مسلم لیگ ن کے قائد نے اجلاس سے خطاب کرتے ہوئے کہا کہ حالات سے گھبرانے یا ڈرنے والا نہیں ہوں، الزام لگانے والوں کوخود نہیں پتا میرا قصورکیا ہے۔

سابق وزیراعظم نوازشریف کا کہنا تھا کہ مسلم لیگ ن پہلے کی طرح متحد اورمضبوط ہے، صرف چند مفاد پرست لوگ ہمیں چھوڑ کر گئے ہیں۔

نوازشریف کا کہنا تھا کہ آئندہ انتخابات حکومت کی5 سالہ کارکردگی پرلڑیں گے، عوامی نمائندے انتخابی مہم کوتیزکردیں، رمضان سے قبل 10شہروں میں جلسوں کا پلان ترتیب دیا ہے۔

سابق وزیراعظم کا کہنا تھا کہ ووٹ کوعزت دوکا نعرہ ملک میں مقبولیت حاصل کرچکا ہے، ووٹ کوعزت دیے بغیرملک ترقی نہیں کرسکتا۔

مسلم لیگ ن کے قائد نوازشریف کا کہنا تھا کہ مسلم لیگ ن کوجلسوں میں زبردست پذیرائی مل رہی ہے، انتخابات میں عوامی عدالت سے بھی سرخرو ہوں گے۔

سابق وزیراعظم نوازشریف کا کہنا تھا کہ ملک میں صرف میرا ہی احتساب ہورہا ہے، پاناما میں شامل 400 لوگوں کے خلاف کوئی کارروائی ہوئی؟۔

نوازشریف کا کہنا تھا کہ کراچی میں امن وامان کا کریڈٹ بھی مسلم لیگ ن کوجاتا ہے، سی پیک منصوبہ عوام کے لیے ہماری حکومت کا تحفہ ہے۔

سابق وزیراعظم کا کہنا تھا کہ ہمیں بڑی خوشی ہے کہ عبادت سمجھ کر پوری طرح پاکستان کی خدمت کررہے تھے، 2018 اور2017 کا پاکستان 2013 والے پاکستان سے مختلف ہے۔

مسلم لیگ ن کے قائد کا کہنا تھا کہ پاکستان جرائم کرنے کے لیے تونہیں بنا تھا، سندھ میں جرائم ختم کرنا صوبائی حکومت کا کام تھا، سندھ حکومت سے پوچھتاہوں جرائم ختم کیوں نہ کیے۔

نوازشریف کا کہنا تھا کہ سندھ میں لوگ ہماری خدمت کواچھے الفاظ میں یاد کرتے ہیں، خدمت کے صلے میں ہمیں ہفتے میں پانچ پانچ دن پیشیاں بھگتنا پڑتی ہیں۔

سابق وزیراعظم کا کہنا تھا کہ جلسہ لاہورکا، مجمع پشاورکا اورایجنڈا کسی اورکا، نیا پاکستان جھوٹ بولنے سے نہیں سچ بولنے سے بنتا ہے۔

مسلم لیگ ن کے قائد نوازشریف کا کہنا تھا کہ اوپرسے آرڈرکا مطلب بنی گالا بتایا گیا، کیا اوپروالے بنی گالا میں رہتے ہیں، کسے بےوقوف بنا رہے ہیں۔

نوازشریف کا کہنا تھا کہ عمران خان بتائیں خیبرپختونخواہ میں عوام کی کیا خدمت کی ہے، خیبرپختونخواہ میں کام کا پنجاب سے موازنہ کریں۔

سابق وزیراعظم نوازشریف کا کہنا تھا کہ ہم نےدیہات سےشہروں تک سڑکیں بنائیں، اسکول بنائے، اسپتال بنائے، یونیورسٹیاں بنائیں، ان منصوبوں کومکمل کیا جوکئی دہائیوں سے مکمل نہیں ہورہےتھے۔

مسلم لیگ ن کے قائد کا کہنا تھا کہ دس سال سے مکمل نہ ہونے والےنیلم جہلم منصوبے کومکمل کی، بلوچستان میں ہزاروں ایکڑقابل کاشت بنائی، ہم نے یہ خدمت اپنا فرض سمجھ کرکے ادا کی۔

نوازشریف کا کہنا تھا کہ شہبازشریف نے گیس والے منصوبے شروع کیے، یہ منصوبے شروع نہ ہوتے تو آج بھی 15،15 گھنٹے کی لوڈشیڈنگ ہوتی۔

سابق وزیراعظم کا کہنا تھا کہ 1997سے 1999 تک مجھے موقع دیا ایٹمی دھماکے کر ڈالے، کلنٹن نےمجھے 5ارب ڈالرکی آفرکی کہ ایٹمی دھماکے نہ کریں۔

نوازشریف کا کہنا تھا کہ خودغرض یا لالچی ہوتا تویہ رقم اپنے پاس بھی رکھ سکتا تھا، میں نے کہا ہمیں ایڈ نہیں چاہیے،ایٹمی دھماکے ہرصورت کریں گے۔

سابق وزیراعظم کا کہنا تھا کہ ایٹمی دھماکے بھارت نے کردیے تھے ہم نے بھی کرنے تھے، بل کلنٹن کوکہا ہم مجبورہیں ایٹمی دھماکے ہرصورت کریں گے۔

مسلم لیگ ن کے قائد کا کہنا تھا کہ کرائےکے لوگ سینیٹ میں پہنچے بدترین خرید وفروخت کی گئی، سینیٹ میں ایسے لوگ آئے جنہیں کوئی جانتا تک نہیں تھا، کیا ملک ایسے چلےگا، کیا پاکستان ہم نے اس لیے بنایا تھا۔

نوازشریف کا کہنا تھا کہ بلوچستان کی حکومت توڑنے کی اجازت کس نے دی، قوم ایسےعناصرسے جواب مانگتی ہے، انہوں نے کہا کہ سینیٹ میں ایسے شخص کوووٹ ڈالے گئے جس کوہمسایہ بھی نہیں جانتا۔

سابق وزیراعظم کا کہنا تھا کہ اگرہم پیچھےہٹے توتاریخ ہمیں کبھی معاف نہیں کرے گی، ہمارے اگلے 70سال گزشتہ 70سال کی طرح نہیں ہونے چاہئیں۔

مسلم لیگ ن کے قائد کا کہنا تھا کہ بڑی بڑی باتیں کرنے والوں نے سینیٹ میں تیرپرمہرلگائی، یہ کون سا اصول ہے اعلان کچھ اورعمل کچھ اورکرتے ہیں۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں