لندن: مسلم لیگ ن کے قائد نواز شریف نے چیف جسٹس عمر عطا بندیال سے مستعفی ہونے کا مطالبہ کردیا۔
سماجی رابطے کی ویب سائٹ ٹوئٹر پر مسلم لیگ ن کے قائد نواز شریف نے لکھا کہ چیف جسٹس مزید تباہی کرنے کے بجائے فی الفور مستعفی ہوجائیں۔
نواز شریف نے کہا کہ عدالتیں قوموں کو بحرانوں سے نکالتی ہیں دھکیلتی نہیں، چیف جسٹس نے اکثریتی فیصلے پر اقلیتی رائے مسلط کردی۔
انہوں نے کہا کہ چیف جسٹس نے نہ جانے کونسا اختیار استعمال کیا ہے، منصب، آئین کی توہین کرتے ہوئے پی ٹی آئی ایجنڈے کو آگے بڑھایا ہے۔
عدالتیں قوموں کو بحرانوں سے نکالتی نہ کہ بحرانوں میں دھکیلتی ہیں۔چیف جسٹس نے نہ جانے کونسا اختیار استعمال کر کے اکثریتی فیصلے پر اقلیتی رائے مسلط کردی۔اپنے منصب اور آئین کی توہین کرتے ہوئے PTI کے ایجنڈے کو آگے بڑھانے والا چیف جسٹس مزید تباہی کرنے کے بجائے فی الفور مستعفی ہو جائے۔
— Nawaz Sharif (@NawazSharifMNS) April 7, 2023
واضح رہے کہ اس سے قبل وفاقی حکومت نے چیف جسٹس سے فوری طور پر عہدے سے مستعفی ہونے کا مطالبہ کیا تھا۔
وزیر اطلاعات مریم اورنگزیب کا کہنا تھا کہ چیف جسٹس کی ساکھ متاثر ہو چکی ہیں انہیں عہدہ چھوڑ دینا چاہیے، ایک آئین شکن لاڈلے کی سہولت کاری قبول نہیں کریں گے، یہ عیاں ہو چکا ہے کہ عمران داری ہو رہی تھی، جب پٹیشن ہی مسترد کر دی گئی تھی تو اس پر ایک اور فیصلہ کیسے آگیا؟
ان کا کہنا تھا کہ یہ الیکشن کا نہیں بینچ فکسنگ کا معاملہ ہے، عدالتی کارروائی کو دیگر ججز نہ مانیں تو عوام کیسے مان لیں؟ سوال اٹھتے ہیں عدالتی سہولت کاری کیوں ہوئی؟ کیوں ججز نے اس معاملے سے خود کو الگ کر لیا ہے؟
