اسلام آباد: نیشنل کمانڈ اینڈ آپریشن سینٹر کی جانب سے سرکاری دفاتر کے لیے رہنما اصول جاری کردیے گئے، ماسک اور سماجی فاصلے کو ایک بار پھر لازمی قرار دے دیا گیا۔
تفصیلات کے مطابق وفاقی وزیر صحت عبدالقادر پٹیل کا کہنا ہے کہ کرونا وائرس سے نمٹنے کے لیے صورتحال کا جائزہ لیا جاتا ہے اور مانیٹرنگ کی جاتی ہے۔
وزیر صحت کا کہنا ہے کہ عوام کو کرونا وائرس سے بچنے کی حکومتی گائیڈ لائنز پر عملدر آمد کرنا ہوگا، ماسک کا استعمال کریں اور سماجی فاصلے کو یقینی بنائیں۔
دوسری جانب نیشنل کمانڈ اینڈ آپریشن سینٹر کی جانب سے سرکاری دفاتر کے لیے رہنما اصول جاری کیے گئے ہیں۔
جاری کردہ اصولوں کے مطابق دفتر سمیت ہر جگہ بیٹھنے کے دوران سماجی فاصلہ رکھا جائے، عبادت اور نماز کے دوران بھی سماجی فاصلہ یقینی بنایا جائے، دفاتر کے داخلی راستوں اور واش رومز میں ہینڈ سینی ٹائزر موجود ہونا چاہیئے۔
ہدایات میں کہا گیا ہے کہ ہاتھ ملانے سے گریز کیا جائے، کرونا وائرس کی علامات رکھنے والوں کو دفاتر اور عمارتوں میں داخل نہ ہونے دیا جائے۔ ہر کسی کے ماسک پہننے کو یقینی بنایا جائے۔
