جنوبی کیرولائنا: امریکا میں نئی نویلی دلہن نشے میں دھت خاتون ڈرائیور کی ٹکر سے خوفناک حادثے میں ہلاک ہو گئی جبکہ دلہا شدید زخمی ہوگیا۔
عالمی خبر رساں ادارے کے مطابق یہ افسوسناک واقعہ جنوبی کیرولائنا میں پیش آیا جہاں شادی کی تقریب کے بعد دلہا دلہن گولف کارٹ میں سوار ہو کر گھر جانے کے لیے نکلے ہی تھے کہ نشے میں دھت خاتون کار سوار نے ٹکر مار دی۔
رپورٹ میں بتایا گیا کہ تیز رفتار کار نے گولف کارٹ کو عقب سے ٹکر ماری جس پر نوبیاہتا جوڑے فضا میں کئی فٹ بلند ہوکر قلابازیاں کھاتے ہوئے گر گئے۔
حادثے میں 34 سالہ دلہن سمانتا موقع پر بھی دم توڑ گئی جب کہ دلہا آرک ہچنسن شدید زخمی ہو گیا جسے قریبی اسپتال منتقل کردیا گیا تاہم اس کی حالت بھی تشویشناک بتائی جا رہی ہے۔
رپورٹ کے مطابق نوبیاہتا جوڑے کے گولف کارٹ کو ٹکر مارنے والی کار سوار نشے میں دھت تھی جسے گرفتار کرلیا گیا ہے۔
