بیجنگ: چینی ماہرین نباتات نے مغربی صوبے سیچھوان میں ایک نئی قسم کا پودا دریافت کر لیا ہے۔
تفصیلات کے مطابق چین میں محققین نے معدومی کے خطرے سے دوچار پودے آرکڈ (Orchids) کی ایک نئی قسم دریافت کی ہے۔
چائنیز اکیڈمی آف سائنسز کے ماتحت ووہان بوٹینیکل گارڈن (ڈبلیو بی جی) کا کہنا ہے کہ آرکڈ کی اس نئی قسم کے پھول سفید ہیں، ماہرین نے پھول کا نام ‘پونیروکِس وولونگیسس’ رکھا ہے۔
نارڈک جرنل آف باٹنی میں شائع شدہ تحقیقی مقالے کے مطابق یہ نام وولونگ نیشنل نیچر ریزرو کے نام پر رکھا گیا ہے، جہاں اسے پہلی بار جولائی 2020 میں دیکھا گیا تھا۔
رواں برس سیچھوان میں ڈبلیو بی جی کی جانب سے دریافت ہونے والی آرکڈ کی یہ دوسری نئی قسم ہے، اس سے پہلے محققین نے آرکڈ کی ایک اور نئی قسم ‘کوریلورائیزا سیننسز’ دریافت کی تھی۔
رواں مہینے ہی چینی ماہرین نے 2014 میں دریافت شدہ آرکڈ کی ایک قسم پر کئی برس کی تحقیق کے بعد آخر کار اسے نئی قِسم قرار دے دیا۔ اس قسم کو بلبوفائلم ہماتُم کا نام دیا گیا۔
پہاڑوں، سطح مرتفع اور دریائی طاسوں سمیت مختلف خطوں کے ساتھ چین کا سیچھوان صوبہ حیاتیاتی تنوع سے مالا مال ہے، اس میں آرکڈ کی 450 سے زیادہ اقسام ریکارڈ کی جا چکی ہیں۔
آرکڈ فیملی انجیو اسپرمز کا دوسرا سب سے بڑا خاندان ہے، دنیا بھر میں یہ فیملی تقریباً 28 ہزار انواع پر مشتمل ہے، اور اسے معدومی کے خطرے سے دوچار پودوں کی انواع میں شامل کیا گیا ہے۔
