کراچی: محکمہ داخلہ سندھ نے ہوٹلز اور ریسٹورنٹس سے متعلق ترمیمی حکم نامہ جاری کردیا۔
اے آر وائی نیوز کی رپورٹ کے مطابق محکمہ داخلہ سندھ نے ترمیمی حکم نامہ جاری کیا ہے جس کے مطابق سندھ میں ہوٹلز اور ریسٹورنٹس ہفتہ، اتوار کو بھی کاروبار کرسکیں گے۔
حکم نامے کے مطابق ریسٹورنٹس، کیفے کے لیے ٹیک اوے کے اوقات کار شام 7 بجے تک ہوں گے، ریسٹورنٹس، کیفے سے ہوم ڈیلیوری سروس رات 10 بجے تک ہوگی۔
محکمہ داخلہ سندھ کی جانب سے جاری کردہ حکم نامے کے مطابق ہوٹلز، کیفے، ریسٹورنٹس ایس او پیز پر عملدرآمد کے پابند ہوں گے۔
مزید پڑھیں: سندھ حکومت نے کرونا سے متاثرہ علاقوں کو بند کرنے کیلئے غور شروع کردیا
دوسری جانب وزیر اطلاعات سید ناصر حسین شاہ کا کہنا تھا کہ شہر قائد میں لاک ڈاون کی ضرورت ہے لیکن کراچی میں کب لاک ڈاون ہوگا یہ ابھی نہیں بتاسکتے۔
ان کا کہنا تھا کہ پہلے مرحلے میں جن علاقوں میں کرونا کیسز زیادہ رپورٹ ہوئے ہیں انہیں سیل کیا جائے گا۔
صوبائی وزیر اطلاعات ناصر حسین شاہ نے وفاقی حکومت پر کیسز کے بڑھنے کا ملبہ ڈالتے ہوئے کہا کہ سندھ حکومت کو پہلے روز سے لاک ڈاون چاہتی تھی لیکن وفاق آڑے آجاتا تھا۔
واضح رہے کہ سندھ بھر میں کرونا وائرس سے متاثرہ افراد کی تعداد 53 ہزار 805 ہوگئی ہے جبکہ کرونا سے 831 افراد جاں بحق ہوچکے ہیں۔