اسلام آباد: قومی احتساب بیورو (نیب) نے اصلاحات کے پہلے مرحلے کے تحت شکایات پر فوری کارروائی کیلیے نئے قواعد و ضوابط جاری کر دیے۔
نئے قواعد و ضوابط کے مطابق گمنام، ناقص اور غیر سنجیدہ درخواستوں پر کوئی کارروائی نہیں ہوگی تاہم جھوٹے درخواست دہندگان کے خلاف قانونی کارروائی ہوگی، شکایات پر کارروائی کے دوران الزام علیہ کو ’جواب دہندہ‘ کے طور پر مخاطب کیا جائے گا۔
نیب کے مطابق جواب دہندگان کا نام صیغہ راز میں رکھا جائے گا، آئین پاکستان کے مطابق جواب دہندگان کی عزت نفس مجروح نہیں کی جائے گی، درخواست دہندہ کیلیے قواعد و ضوابط وضع کر دیے گئے، عائد الزامات کی تصدیق کیلیے حلف نامہ دینا ہوگا۔
اس میں مزید کہا گیا کہ سرکاری ملازمین کے خلاف تحقیقات کیلیے سول سکریٹریٹس میں احتساب سہولت سیل قائم ہوں گے، قواعد و ضوابط پر پوری نہ اترنے والی موصول درخواستیں بہت جلد نمٹا دی جائیں گی۔
نیب کے مطابق ہیڈ کوارٹرز اور ریجنل بیوروز میں شکایات سیل قائم کر دیے گئے، چیمبر آف کامرس اور کاروباری تنظیموں کے نمائندوں پر مشتمل شکایات سیل قائم ہوں گے، شکایت پر کسی خاتون کو رشتہ دار کے بغیر نیب آفس نہیں بلایا جائے گا۔
قواعد و ضوابط میں کہا گیا کہ رشتہ دار نہ ہونے پر نیب کی خاتون افسر انکوائری کرے گی۔ جواب دہندگان سے شکایات پر کارروائی سے متعلق فیڈ بیک لینے کا طریقہ کار بھی وضع کیا گیا۔
