پاکستان ریلوے نے ملک بھر میں ریزرویشن دفاتر کے اوقات کار کا شیڈول تبدیل کر دیا۔
تفصیلات کے مطابق ریلوے نے 20 رمضان سے ریزرویشن دفاتر کے اوقات کار نیا شیڈول جاری کر دیا ہے۔
نئے شیڈول کے مطابق مارننگ شفٹ صبح 8بجے سے لے کر دوپہر 2:30 بجے تک ہو گی جب کہ شام کی شفٹ دوپہر 2:30 بجے سے رات9 بجے تک کام کرے گی۔
ترجمان ریلوے کا کہنا ہے کہ سنگل شفٹ والےریزرویشن دفاترکےوقت میں تبدیلی نہیں کی گئی۔
اس سے قبل مسافروں کی کمی کی وجہ سے چار ٹرینیں معطل کرنے کا اعلان کیا تھا، کورونا وائرس کی وجہ سے ریلوے میں مسافروں کی کمی دیکھنے میں آئی ہے۔
ذرائع کے مطابق کراچی سے لاہور چلنے والی جناح ایکسپریس کو معطل کیا گیا ہے، جناح ایکسپریس کے مسافروں کو قراقرم ایکسپریس میں ایڈجسٹ کیا جائے گا۔
کراچی ایکسپریس اور پاک بزنس ایکسپریس کو بھی معطل کردیا گیا ہے، کراچی، اسلام آباد کے لیے چلنے والی گرین لائن ایکسپریس بھی معطل کی گئی ہے۔
ریلوے حکام کے مطابق چاروں ٹرینوں کے کنفرم ٹکٹ رکھنے والے مسافروں کو دوسری ٹرینوں میں ایڈجسٹ کیا جائے گا۔
ریلوے حکام کا کہنا ہے کہ سرسید ایکسپریس کراچی سے براستہ فیصل آباد، لاہور، اسلام آباد جائے گی، سرسید ایکسپریس میں گرین لائن ایکسپریس کے مسافروں کو ایڈجسٹ کیا گیا ہے۔
اسی طرح قراقرم ایکسپریس کراچی سے جناح، بزنس ایکسپریس کے مسافروں کو لے کر جائے گی۔
