نیو یارک سٹی : شدید طوفان کے بعد زمین پھٹی اور پوری وین کو نگل لیا، مختصر سی ویڈیو نے دیکھنے والوں کو حیرت زدہ کردیا۔
امریکہ میں سمندری طوفان اگرچہ اس وقت اپنے عروج پر نہیں مگر اس کی وجہ سے چلنے والی تیز ہواؤں نے امریکہ کی شمالی مشرقی ریاستوں کو بری طرح متاثر کیا ہے۔
نیویارک اور نیوجرسی کے علاقوں میں شدید بارشوں کی وجہ سے سڑکوں پر پانی کھڑا ہے اور کچھ علاقوں میں سیلابی صورتحال بن چکی ہے۔
امریکی محکمہِ موسمیات نے مزید شدید بارشوں کا انتباہ جاری کرتے ہوئے عوام کو متنبہ کیا ہے کہ وہ گھروں سے باہر نہ نکلیں۔
طوفان کے دوران بنائی گئی اس ویڈیو میں دیکھا جاسکتا ہے کہ برونکس کی سڑک کے کنارے کھڑی خالی وین بائیں جانب جھکنا شروع ہوجاتی ہے اور اچانک زمین پھٹتی ہے اور پوری وین اس میں گرجاتی ہے۔
سوشل میڈیا پر ہونے والی وائرل ویڈیو پر صارفین نے خوف کا اظہار کرتے ہوئے 58 فٹ لمبے، 15 فٹ چوڑے اور 20 فٹ گہرے گڑھے کی مرمت کیلئے متعلقہ حکام سے فوری نوٹس لینے کا مطالبہ کیا۔
بعد ازاں مزید حادثات کو روکنے کے لیے نیویارک سٹی ڈیپارٹمنٹ آف انوائرنمنٹل پروٹیکشن کے عملے نے سڑک کے خلا کو پر کرنے کے لیے رات بھر کام کیا اور گاڑی کو گڑھے سے نکال کر اسے بند کردیا۔
