ویلنگٹن: نیوزی لینڈ کے صحت حکام نے فائزر ویکسین سے شہری کی موت کا دعویٰ کیا ہے۔
تفصیلات کے مطابق نیوزی لینڈ کے حکام نے پیر کے روز کہا کہ انھوں نے ایک 26 سالہ شخص کی موت کو فائزر کی کرونا ویکسین سے جڑا پایا ہے، مذکورہ شخص فائزر ویکسین کی پہلی ڈوز کے بعد دل کے پٹھوں کی ایک کمیاب سوزش مایوکارڈائٹس کا شکار ہو گیا تھا۔
نیوزی لینڈ میں یہ دوسری موت ہے جو کرونا ویکسین کے معروف لیکن کمیاب ضمنی اثرات سے منسلک ہے، اگست میں صحت کے حکام نے اطلاع دی تھی کہ ایک خاتون ویکسین کی ڈوز لینے کے بعد مر گئی تھی۔
کرونا ویکسین کے حوالے سے ایک انڈیپنڈنٹ سیفٹی مانیٹرنگ بورڈ نے بیان میں کہا کہ ہمیں دستیاب معلومات سے یہ سامنے آیا ہے کہ ممکنہ طور پر مذکورہ شخص میں مایوکارڈائٹس ویکسینیشن کی وجہ سے ہوا تھا۔
تاہم یہ بھی معلوم ہوا ہے کہ مرنے والے شخص نے پہلی ڈوز کے بعد اپنی علامات کے لیے کوئی طبی مشورہ نہیں لیا تھا، اور دو ہفتوں کے اندر مر گیا۔
یاد رہے کہ مایوکارڈائٹس دل کے پٹھوں کی ایک سوزش ہے جو خون پمپ کرنے کے دل کی صلاحیت کو محدود کر سکتی ہے اور دل کی دھڑکن کی تال میں تبدیلی کا سبب بھی بن سکتی ہے۔
فائزر کے ترجمان نے کہا کہ کمپنی نیوزی لینڈ میں موت کی اطلاع سے آگاہ تھی، کمپنی نے ممکنہ منفی اثرات والے واقعات کی تمام رپورٹس کی نگرانی کی ہے، کمپنی کو یہ یقین ہے کہ اس کی ویکسین کے فوائد واضح ہیں۔
کمیاب ضمنی اثرات کے باوجود، ویکسین سیفٹی بورڈ نے کہا کہ ویکسینیشن کے فوائد خطرات سے بہت زیادہ ہیں۔
