The news is by your side.

Advertisement

کراچی میں آئندہ 10 دنوں کے لیے موسم کی اہم پیش گوئی

کراچی: محکمہ موسمیات کا کہنا ہے کہ سندھ میں مزید بارشوں کا سلسلہ تھم چکا ہے، اگلے 10 دنوں کے دوران سندھ کے بیش تر علاقوں میں موسم خشک رہے گا۔

اے آر وائی نیوز کے مطابق محکمہ موسمیات نے پیش گوئی کی ہے کہ سندھ میں بارشوں کا سلسلہ تھم چکا ہے، تاہم آئندہ دس دنوں کے دوران چند مقامات پر معمولی بارش ہو سکتی ہے، مجموعی طور پر کراچی سمیت بیش تر علاقوں میں موسم خشک رہے گا۔

موسمیات کا کہنا ہے کہ کراچی میں آئندہ 10 روز کے دوران خشک موسم امدادی کاموں کے لیے معاون ہوگا۔

ادھر وفاقی وزیر ہوابازی غلام سرور خان نے کہا ہے کہ کراچی میں 10 دنوں تک موسم خشک رہنے کا امکان ہے، اس لیے وہاں بارشوں سے متاثرہ علاقوں میں امدادی سرگرمیوں کے لیے موسم سازگار ہوگا۔

انھوں نے کہا محکمہ موسمیات کے مطابق اسلام آباد، صوبہ پنجاب، خیبر پختون خوا، کشمیر اور گلگت بلتستان کے علاقوں میں جمعرات اور جمعے کے روز مزید بارش کی پیش گوئی ہے۔

غلام سرور خان نے کہا کہ تیز بارشوں سے راولپنڈی، گوجرانوالہ، لاہور کے نشیبی علاقے زیر آب آنے کا خدشہ ہے، خیبر پختون خواہ، کشمیر اور گلگت بلتستان میں لینڈ سلائیڈنگ کا بھی خدشہ ہے۔

‘کراچی میں بارش سے تباہی قدرتی طور پر بنے ڈیفنس سسٹم خراب ہونے کی وجہ سے ہوئی

واضح رہے کہ محکمہ موسمیات نے پیر سے کراچی میں بارشوں کی پیش گوئی کی تھی لیکن بارش نہیں ہوئی، اس سے قبل ہفتہ اور اتوار کو بھی امکان ظاہر کیا گیا تھا لیکن بارش نہیں ہوئی۔

شہر قائد میں تیز طوفانی بارشوں سے شہر بھر میں بے پناہ نقصان ہو چکا ہے، جانوں کے ضیاع کے ساتھ ساتھ لوگوں کے املاک کو بھی شدید نقصان پہنچا، متعدد علاقے کئی دنوں پر بارش کے پانی میں ڈوبے رہے۔

Comments

یہ بھی پڑھیں