اسلام آباد: سپریم کورٹ میں این جی اوز کی رجسٹریشن سے متعلق کیس میں سیکریٹری لا اینڈ جسٹس کمیشن نے کہا کہ ایک کمیٹی بنا دی گئی ہے، این جی اوز کی رجسٹریشن کے لیے ملنے والی درخواستیں کمیٹی کو بھجوا دی جاتی ہیں۔
تفصیلات کے مطابق سپریم کورٹ میں این جی اوز کی رجسٹریشن سے متعلق کیس کی سماعت ہوئی۔ عدالت نے این جی اوز کی رجسٹریشن اور ان کی مانیٹرنگ کا کیس نمٹا دیا۔
سماعت میں سیکریٹری لا اینڈ جسٹس کمیشن کی جانب سے رپورٹ پیش کی گئی۔ سیکریٹری لا اینڈ جسٹس کمیشن ڈاکٹر عبد الرحیم نے کہا کہ ایک کمیٹی بنا دی گئی ہے، وزارت داخلہ کو ملنے والی درخواست کمیٹی کو بھجوا دی جاتی ہے۔
انہوں نے بتایا کہ کمیٹی کے اطمینان کے بعد اسے کام کرنے کی اجازت دی جاتی ہے، 141 درخواستیں موصول ہوئیں، 75 کی رجسٹریشن ہوچکی ہے، 19 درخواستیں زیر التوا ہیں جبکہ 47 کی درخواستیں مسترد کی ہیں۔
انہوں نے کہا کہ نئی رجسٹریشن سے پہلے تمام این جی اوز کی رجسٹریشن ختم کردی گئی، پنجاب حکومت نے دوبارہ اسکروٹنی کے بعد رجسٹر کیا، بلوچستان میں اس وقت کسی کو بھی کام کی اجازت نہیں ہے۔
عدالت نے کہا کہ کسی کو پالیسی سے اختلاف ہے تو متعلقہ فورم پر رجوع کرے جس پر سیکریٹری نے بتایا کہ وزارت داخلہ کی پالیسی کو کسی بھی فورم پر چیلنج نہیں کیا گیا۔
خیال رہے کہ گزشتہ روز انکشاف ہوا تھا کہ محکمہ سماجی بہبود کے پاس رجسٹرڈ 80 فیصد این جی اوز کا ریکارڈ موجود ہی نہیں ہے، اس حوالے سے محکمہ سوشل ویلفیئر نے ایسی این جی اوز کی چھان بین کا فیصلہ کیاتھا۔
ان این جی اوز کو تجدید کے لیے 15 دن کی حتمی مہلت دی گئی ہے۔
اس سے قبل وزارت داخلہ نے این جی اوز سے متعلق اہم اور سخت اقدامات اٹھاتے ہوئے ملکی قوانین اور قواعد و ضوابط پر عمل درآمد نہ کرنے والی 18 عالمی این جی اوز کو 60 روز میں ملک چھوڑنے کا حکم جاری کیا تھا۔
