واشنگٹن: امریکی شہر اٹلانٹا میں گیس لیکج کے باعث دھماکا ہوا، جس کے نتیجے میں چھ افراد ہلاک جبکہ 130سے زائد متاثر ہوئے ہیں۔
امریکی میڈیا کے مطابق جارجیا پولیس کی جانب سے جاری بیان میں بتایا گیا کہ گینزول میں واقع فوڈ پروسیسنگ پلانٹ میں مائع نائٹروجن لیک ہونے کے باعث چھ افراد ہلاک جبکہ نو زخمی ہوئے۔
پولیس کے مطابق حادثہ مقامی وقت کے مطابق صبح دس بجے ہال کنٹری کے قریب واقع پرائم پاک فوڈ کے پولٹری پروسیسنگ پلانٹ میں رونما ہوا۔
امریکی میڈیا کے مطابق کمیکل دھماکے کے بعد مقامی انتظامیہ نے فوری طور پر متاثرہ عمارت کے اطراف تعلیمی ادارے اور کاروباری مراکز کو بند کردیا ہے۔
امریکی میڈیا کے مطابق پلانٹ میں کام کرنے والے 130 افراد کو پلانٹ سے نکال کر اسپتال منتقل کیا گیا، جہاں ان کا طبی معائنہ کیا گیا، جس میں سے کئی افراد کو علاج کے لئے قریبی اسپتالوں میں منتقل کیا گیا، جائے حادثے پر پہنچنے والے فائر فائٹرز نے بھی گیس لیکج کے باعث سانس لینے میں دشواری کی شکایت کی۔
