کراچی: گورنر سندھ عمران اسماعیل نے وفاق کے تحت شہر قائد میں زیر تعمیر گرین لائن بس منصوبے کے افتتاح کے لیے ٹائم لائن دینے سے انکار کرتے ہوئے کہا ہے کہ فی الحال منصوبے کے مکمل ہونے کی حتمی تاریخ نہیں دے سکتے۔
کراچی میں میڈیا سے گفتگو کرتے ہوئے گورنر سندھ عمران اسماعیل نے کہا کہ صوبہ سندھ کا مقدمہ وزیراعظم عمران خان کےسامنے پیش کیا ہے، گرین لائن کیلئے بسوں کا ٹینڈر ابھی نہیں ہوا اور گرین بس کیلئے ابھی کوئی ٹائم لائن نہیں دے سکتا، گرین لائن کانہیں بلکہ 6 منصوبوں کےافتتاح کی بات کہی تھی۔
گورنر سندھ نے بتایا کہ سندھ حکومت نے ایل این جی خریدنےسے انکار کیا ہے، وزیراعلیٰ سندھ سے ایل این جی پر نظرثانی کیلئے کہوں گا جب کہ لیکج اور گیس چوری پر قابو پایا جائے تو بحران پر قابو پایاجاسکتاہے۔
ان کا کہنا تھا کہ پی ٹی آئی کی حکومت سے عوام کو بہت توقعات ہیں، حکومت دل و جان سے عوام کی سہولت کیلئے کام کررہی ہے، حکومت چھوٹی موٹی غلطیاں کرسکتی ہے مگر کرپشن کہیں نظرنہیں آئے گی۔
انہوں نے کہا کہ پاکستان میں باکسنگ اورفٹبال بہت مقبول ہے، لیاری میں فٹبال اور باکسنگ کیلئے بہت ٹیلنٹ موجودہے مگر میری عمر باکسنگ اور فٹبال کھیلنے کی نہیں ہے ۔
