آئل سے بھرے 2 ٹینکروں میں خوفناک تصادم، ڈرائیور جاں بحق

سکھر: پنو عاقل کے قریب قومی شاہراہ پر دو آئل ٹینکروں میں خوفناک تصادم کے نتیجے میں ٹرک ڈرائیور جاں بحق جبکہ کنڈیکٹر زخمی ہوگیا۔

اے آر وائی نیوز کے مطابق آئل ٹینکروں میں تصادم کے باعث آئل ٹینکر کی ٹنکی لیک ہوگئی جس سے سڑک پر آئل بہنے لگا، جبکہ اہل علاقہ تیل جمع کرنے میں مصروف ہوگئے۔

ذرائع کا کہنا ہے کہ کوکنگ آئل سے بھرے ٹینکر کو پیچھے سے آنے والے آئل ٹینکر نے ٹکر ماری، جس کے باعث ڈرائیور موقع پر ہی زندگی کی بازی ہار گیا، جبکہ کنڈیکٹر شدید زخمی ہوگیا جسے فوری طور پر قریبی اسپتال پہنچایا گیا۔

حادثے کے نتیجے میں سڑک پر آئل بہنے لگا جسے دیکھ کر اہل علاقہ نے کولر، بالٹیوں اور دیگر برتنوں میں تیل بھرنا شروع کر دیا، پولیس نے موقع پر پہنچ کر لاش قبضے میں لے کر قانونی کارروائی کا آغاز کردیا ہے۔

Comments