واشنگٹن: امریکا میں صدارتی انتخابات میں روسی مداخلت سے متعلق رپورٹ سامنے آنے کے بعد ڈیموکریٹس نے صدر ٹرمپ کے مواخذے کا مطالبہ کردیا۔
تفصیلات کے مطابق امریکی سپیشل قونصل رابرٹ ملر کے پہلی بار عام ریمارکس کے بعد امریکی کانگریس میں تین سرکردہ ڈیموکریٹس پارٹی کے ارکان نے صدر ٹرمپ کے مواخذے کا مطالبہ کیا ہے۔
صدر ٹرمپ کے دعوے کے برعکس بدھ کے روز رابرٹ ملر نے کہا تھا کہ ان کی تحقیقات کے مطابق صدر ٹرمپ انصاف کی راہ میں رکاوٹ ڈالنے کے الزام سے بری نہیں ہوئے۔
رابرٹ ملر کو دو ہزار سولہ کے صدارتی انتخابات میں روسی مداخلت کی تحقیقات کا کام سونپا گیا تھا، مواخذے کے معاملے نے ڈیموکریٹک پارٹی کو منقسم کر دیا ہے اور ایوان نمائندگان میں سپیکر نینسی پلوسی کی مخالفت میں اضافہ ہو رہا ہے۔
مگر اب رابرٹ ملر کے ریمارکس کے بعد صدارتی نامزدگی کے خواہشمند تین مزید ڈیموکریٹکس نے صدر ٹرمپ کے مواخذے کا مطالبہ کیا ہے۔
اس طرح ڈیموکریٹک پارٹی کی طرف سے نامزدگی کے خواہشمند تئیس امیدواروں میں سے مواخذے کا مطالبہ کرنے والوں کی تعداد دس ہوگئی ہے۔
ان تین ڈیموکریٹک امیدواروں میں کوری بکر، کرسٹِن گِلیِبرانڈ اور پیٹی بیٹیگائگ شامل ہیں۔ ان کا مطالبہ ہے کہ مواخذے کی کارروائی فوری طور پر شروع ہو جانی چاہیئے۔
انتخابات میں روسی مداخلت کا معاملہ، ٹرمپ نے رپورٹ ایک بار پھر مسترد کردی
یاد رہے کہ گذشتہ ماہ امریکا میں صدارتی انتخابات میں روسی مداخلت سے متعلق میولر رپورٹ سامنے آئی تھی، جس میں روس کا امریکی انتخابات میں مداخلت کا انکشاف ہوا تھا، تاہم صدر ٹرمپ نے رپورٹ مسترد کردی تھی۔
