کراچی: رواں ماہ ملائشیا میں منعقد ہونے والی مکس مارشل آرٹ فیدر ویٹ چیمپئن شپ میں پاکستانی فائٹر ’ولوورین‘ اور ملائشیا کے ’سیوبا‘ ای دوسرے کے مدمقابل ہوں گے، اس سنسنی خیز معرکے کا دونوں فریقین اورشائیقین بے صبری سے انتظار کر رہے ہیں۔
تفصیلات کے مطابق پاکستان سے تعلق رکھنے والے عالمی شہرت یافتہ مکس مارشل آرٹ فائٹر احمد مجتبی 10 فروری کو ملائشیاکے درالحکومت کوالالمپور میں منعقد ہونے والی ون فائٹنگ چیمپئن شپ میں دفاعی چیمپئین کینیو سیوبا کاسامنا کریں گے۔
سیوبا اب تک اپنے کیریئر کے 6 چیمپئن شپ مقابلوں میں حصہ لے چکے ہیں‘ جس میں سے انہوں 4 اعزاز اپنے نام کیے ہیں جبکہ 2 میں ان کو ناکامی کا سامنا کرنا پڑا ہے۔واضح رہے گذشتہ سال 2 ستمبر کو وہ اسی چئمپین شپ کا حصہ بنے تھے اور فاتح قرار پائے تھے۔
دوسری جانب پاکستانی احمد مجتبی کو ایم ایم اے فائٹنگ کی دنیا میں ’ولوورين‘ کہا جا تا ہے ،انہوں نے اپنے کیرئیر کا آغاز گذشتہ سال نومبر میں سنگاپور کے بینڈکٹ انگ کے مدمقابل کیا تھا، تاحال ان کی کامیابیوں کا تناسب آٹھ صفرہے۔
کھیلوں میں دلچسپی رکھنے والوں کا کہنا ہے کہ یہ تاثر درست ہے کہ سیوبا ایک معیاری نام ہے مگر احمد مجبتی بھی کوئی آسان ہدف نہیں ہے.
دوسری جانب احمد مجتبی بھی اس مقابلے کا سامنا کرنے میں پر اعتماد نظر آرہے ہیں ، وہ جیت کے لئے پُر امید ہیں ، احمد مجتبی 6 فروری کو ملائشیا جائیں گے۔
