کراچی: سہراب گوٹھ کے علاقے قیوم آباد میں مخالف گروہوں کے درمیان جھگڑا ہونے کے بعد انھوں نے ایک دوسرے پر دو بدو گولیاں چلائیں۔
تفصیلات کے مطابق کراچی کے علاقے سہراب گوٹھ میں قیوم آباد پر دو مخالف گروہوں کے درمیان ایک دوسرے پر خوف ناک فائرنگ کا واقعہ سامنے آیا ہے، جس کی سی سی ٹی وی فوٹیجز اے آر وائی نیوز نے حاصل کی ہیں۔
فوٹیجز میں مخالفین کو ایک دوسرے پر فائرنگ کرتے دیکھا جا سکتا ہے، گولیاں آس پاس زمین اور دیواروں پر لگیں اور گروہ کے افراد بال بال بچے۔
پولیس حکام نے اس واقعے کے حوالے سے کہا ہے کہ یہ واقعہ دو روز قبل پیش آیا، جس میں دو گروپس میں فائرنگ ہوئی، پولیس حکام کا کہنا ہے کہ دوسرے علاقے سے کچھ افراد آئے اور انھوں نے فائرنگ کی اور فرار ہو گئے۔
فائرنگ کا تبادلہ دونوں جانب سے کیا گیا، جیسا کہ فوٹیجز میں واضح طور پر دیکھا جا سکتا ہے۔
پولیس حکام کے مطابق اس واقعے سے متعلق کسی شخص نے قانونی کارروائی کے لیے پولیس سے رابطہ نہیں کیا، تاہم پولیس نے دونوں پارٹیوں کی معلومات حاصل کر لی ہیں۔
پولیس حکام نے کہا ہے کہ فائرنگ میں ملوث افراد کو جلد گرفتار کر لیا جائے گا۔
