کراچی: شہر قائد کے علاقے اورنگی ٹاؤن میں پولیس اہل کاروں نے محنت کش کا گھر لوٹ لیا۔
تفصیلات کے مطابق اسٹریٹ کرائمز میں جکڑے معاشی حب کراچی میں پولیس چھاپے کی آڑ میں لوٹ مار کا ایک اور واقعہ پیش آیا ہے، جرائم پیشہ گروہوں کے ساتھ ساتھ محکمہ پولیس کے اہل کار بھی شہریوں کو لوٹنے میں مصروف ہیں۔
کراچی کے علاقے اورنگی ٹاؤن میں حالیہ واقعے میں پولیس اہل کاروں نے ایک محنت کش کا گھر لوٹ لیا ہے، پولیس اہل کاروں نے ایک مزدور کے گھر پر جعلی چھاپا مارا، اور موبائل فونز، نقدی اور زیورات لے کر فرار ہو گئے۔
- Advertisement -
متاثرہ محنت کش نے اورنگی تھانے میں نامعلوم پولیس پارٹی کے خلاف مقدمہ درج کر لیا، مقدمے میں 3 سے 4 سادہ لباس، اور 3 باوردی پولیس اہل کاروں کو نامزد کیا گیا ہے۔
ذرائع کے مطابق پولیس حکام نے گھر میں لوٹ مار کرنے والے سرکاری اہل کاروں کی تلاش شروع کر دی ہے۔
