کراچی: اغوا کے بعد قتل ہونے والے مصطفی عامر کی نماز جنارہ ڈیفنس میں ادائیگی کے بعد مقامی قبرستان میں تدفین کردی گئی۔

تفصیلات کے مطابق کراچی کے علاقے ڈیفنس سے اغوا کے بعد قتل کیے جانے والے مصطفی عامر کی لاش کی ڈی این اے سے تصدیق کے بعد ڈیفنس فیز 6 کی مسجد میں نماز جنارہ ادا کی گئی۔

نوجوان کی نماز جنازہ میں اہل خانہ سمیت لوگوں کی بڑی تعداد شریک تھی، جس کے بعد انہیں ڈی ایچ اے فیز 8 قبرستان میں سپرد خاک کیا گیا۔

مصطفیٰ کی لاش بلوچستان کے علاقے حب سے جھلسی ہوئی ملی تھی، ڈی این اے کی رپورٹ آنے کے بعد لاش کی شناخت ممکن ہوئی تھی۔

بعد ازاں قانونی کارروائی مکمل کرنے کے بعد لاش ان کے اہل خانہ کے حوالے کی گئی تھی۔

یاد رہے نوجوان کو 6 جنوری کو ڈی ایچ اے سے اغوا کیا گیا تھا ، جس کے بعد مقتول کی والدہ نے اگلے روز بیٹے کی گمشدگی کا مقدمہ درج کروایا تھا۔

مزید پڑھیں : کراچی : مواچھ گوٹھ قبرستان سے ملنے والی باقیات مصطفیٰ عامر کی نکلیں

پولیس نے مقدمے میں اغوا برائے تاوان کی دفعات شامل کیں اور مقدمہ اینٹی وائلنٹ کرائم سیل (اے وی سی سی) منتقل کیا گیا تھا۔

کیس کی تفتیش کے نتیجے میں پولیس نے دو ملزمان ارمغان اور شیراز کو گرفتار کیا تھا، جنہوں نے انکشاف کیا تھا کہ مصطفیٰ کو ڈی ایچ اے میں قتل کیا گیا تھا اور انہوں نے حب میں اس کی لاش اور اس کی گاڑی کو آگ لگا دی تھی۔

حب پولیس کی جانب سے بارہ جنوری کو مصطفی کی لاش لاوارث قرار دے کر ایدھی حکام کے حوالے کی گئی تھی تاہم بعد ازاں مصطفی کی لاش سولہ جنوری کو کیماڑی ایدھی قبرستان میں دفن کردی گئی تھی۔

21 فروری کو عدالتی حکم پر مصطفیٰ عامر لاش کی شناخت کے لیے قبر کشائی کرکے ڈی این اے نمونے جمع کئے گئے ، جس کے بعد لاش کے ڈی این اے نمونے مصطفیٰ کی والدہ سے میچ کر گئے تھی اور لاش مصطفیٰ کی نکلی تھی۔

کراچی : میمن گوٹھ میں آٹھ ملزمان تاجر کے گھر سے75 تولہ سونے کے زیورات، پچیس لاکھ روپے نقد و دیگر سامان لوٹ کر فرار ہوگئے۔

تفصیلات کے مطابق کراچی کے علاقے میمن گوٹھ میں تاجر قمر بلوچ کے گھر میں ڈکیتی کی بڑی واردات ہوئی۔

واردات کے دوران 8 ملزمان75 تولہ سونےکے زیورات،25 لاکھ نقدی اور دیگرسامان لوٹ کر فرار ہوگئے۔

ملزمان نے گھر کے افراد کو یرغمال بناکر ایک گھنٹے تک لوٹ مار کی، اہل محلہ نے کہا کہ اطلاع دینے کے باوجود پولیس موقع پر نہیں پہنچی۔

میمن گوٹھ میں ایک ہفتے کے دوران ڈکیتی کی دوسری واردات ہے، اس سے قبل میں سات مسلح ملزمان گھر میں گھس کر ڈکیتی کرکے فرار ہوگئے تھے۔

مسلح ملزمان گھر میں موجود افراد کو یرغمال بناکر سونا ، موبائل فون قیمتی سامان اور نقدی لیکر فرار ہوئے۔

اسلام آباد : سینیئر صحافی افضل بٹ ایک بار پھر پاکستان فیڈرل یونین آف جرنلسٹس کے صدر منتخب ہوگئے جبکہ ارشدانصاری سیکرٹری جنرل بن گئے۔

تفصیلات کے مطابق پاکستان فیڈرل یونین آف جرنلسٹس کے انتخابات کے نتائج کا اعلان کر دیا گیا۔

افضل بٹ صدر، ارشد انصاری سیکرٹری جنرل اور لالہ اسد پٹھان سیکرٹری خزانہ منتخب ہوگئے

پی ایف یو جے کی فیڈرل ایگزیکٹو کونسل کے پچیس ممبران کا بھی انتخاب کرلیا گیا۔

پاکستان فیڈرل یونین آف جرنلٹس کے تمام عہدیداران بلا مقابلہ منتخب ہوئے ہیں، پی ایف یو جے انتخابات میں راجہ حبیب الرحمٰن، خالد عیسیٰ کھوکھر، ناصر حسین اور محمد عیسیٰ ترین نائب صدور منتخب ہوئے جبکہ جمشید رضوانی، جاوید اصغر، شاہد چوہدری اور نور الہی بگٹی اسسٹنٹ جنرل سیکرٹری منتخب ہوئے۔

اس موقع پر خطاب کرتے ہوئے نومنتخب صدر افضل بٹ کا کہنا تھا کہ چیلنجز کے سامنے یہ عہدہ کانٹوں کی سیج ہے پیکا کے خلاف عدالتوں اور سڑکوں پر لڑیں گے، عدالت سے بھی مایوسی ہوئی تو سڑکوں پر ہوں گے۔

انھوں نے کہا کہ ہم نے پیکا کا شق وار جواب دے دیا ہے سیاسی جماعتوں وکلاء اور انسانی حقوق تنظیموں سے ملکر دھرنا دیں گے۔

افضل بٹ نے مزید کہا کہ انسانی حقوق کی لڑائی ہماری لڑائی ، آزاد عدلیہ، آزادی صحافت اور شہری آزادیوں کی لڑائی ہماری لڑائی ہے۔

ان کا کہنا تھا کہ فیک نیوز حکومت کے لئے نہیں ہمارے لئے چیلنج ہے، ڈیجیٹل میڈیا کو پی ایف یو جے کے ضابطہ کار میں لایا جائے گا اور نویں ویج بورڈ میں ٹی وی والوں کو بھی شامل کیا جائے گا۔

اس موقع پر خطاب کرتے ہوئے سیکرٹری فنانس لالہ اسد پٹھان نے کہا کہ سڑکوں کی لڑائی پی ایف یو کے کے بڑوں سے سیکھی ہے جنھوں نے تمام تکالیف کے باوجود آزادی صحافت کے حق سے دستبردار نہیں ہوئے۔

انھوں نے کہا کہ پی ایف یو جے کا عہدہ لینا سیاسی عہدہ لینا نہیں یہ ایک مسلسل جدوجہد کا نام ہے پی ایف یوجے کی قیادت پر ذمہ داریاں بڑھتی جارہی ہیں ہم انشا اللہ اپنے تمام حقوق لڑکر لیں گے۔