چیمپئنز ٹرافی کے لیے نیشنل اسٹیڈیم کراچی کی تزئین وآرائش کا کام جاری ہے جس کا بیشتر کام ہوچکا ہے اور یہ جلد مکمل کر لیا جائے گا۔

آئی سی سی چیمپئنز ٹرافی آئندہ ماہ 19 فروری سے 9 مارچ تک پاکستان کی میزبانی میں کھیلی جا رہی ہے اور ایونٹ کا افتتاحی میچ دفاعی چیمپئن پاکستان اور نیوزی لینڈ کے درمیان کراچی نیشنل اسٹیڈیم میں کھیلا جائے گا۔

چیمپئنز ٹرافی کے لیے پاکستان کرکٹ بورڈ کی جانب سے نیشنل اسٹیڈیم کراچی، قذافی اسٹیڈیم لاہور اور پنڈی کرکٹ اسٹیڈیم میں تزئین وآرائش کے لیے مرمتی کام تیزی سے جاری ہے۔

کراچی کے نیشنل اسٹیڈیم کی تعمیر سے متعلق بھارتی میڈیا میں منفی پروپیگنڈا کیا گیا تاہم اچھی خبر یہ ہے کہ نیشنل اسٹیڈیم کا تعمیراتی کام 30 جنوری تک مکمل کر لیا جائے گا۔

نیشنل اسٹیڈیم میں جاری تعمیراتی کام کو مقررہ وقت میں مکمل کرنے کے مشن امپوسیبل کو کنسٹرکشن ورکرز اور ٹیم نے ممکن بنا ڈالا۔

گراؤنڈ کی جانب گرل لگانے کا کام مکمل کر لیا گیا ہے جب کہ فلڈ لائٹس کے لیے نئے فریم لگائے جا رہے ہیں۔ 2 انکلوژر پر ڈیجیٹل اسکرین نصب کی جائیں گی۔

اس حوالے سے پراجیکٹ ڈائریکٹر بلال چوہان نے میڈیا سے گفتگو کرتے ہوئے بتایا کہ ڈیجیٹل اسکرین اس انداز سے نصب کی جائیگی تاکہ شائقین کو مشکلات نہ آئیں۔

نیشنل بینک اسٹیڈیم کے اپ گریڈیشن منیجر ارشد خان نے بتایا کہ نئی عمارت کے فرسٹ فلور پر کھلاڑیوں کا ڈریسنگ روم ہو گا، عمارت کی دوسری اور تیسری منزل پر ہاسپٹیلٹی باکس ہوں گے جب کہ جنرل انکلوژرز میں فولڈنگ چیئر لگائی جاری ہیں۔ اس کے علاوہ چائنا گراونڈ سے ایک خاص برج اسٹیڈیم سے منسلک کیا جائیگا۔

ڈائریکٹر انفرااسٹرکچر جواد قاضی نے بتایا کہ جدید طرز کی عمارت کے فلورز کی فنشنگ جاری ہے، پولز پر نئی ایل ای ڈی لائٹس لگائی جا رہی ہیں اور لائٹس لگانے کا 91 فیصد کام مکمل ہو گیا ہے۔

پاکستان کرکٹ بورڈ کے چیئرمین محسن نقوی نے گزشتہ ماہ دبئی روانگی سے قبل کراچی کے نیشنل اسٹیڈیم کا دورہ کیا تھا اور تعمیراتی کام جلد از جلد مکمل کرنے کی ہدایت کی تھی۔

بھارت باز نہ آیا، ایک بار پھر چیمپئنز ٹرافی میں سیاست لے آیا

بھارت سیاسی مخالفت سے کھیلوں کے میدان بھی پراگندہ کر رہا ہے اور چیمپئنز ٹرافی میں ایک بار پھر سیاست کو لے آیا ہے۔

آئی سی سی چیمپئنز ٹرافی آئندہ ماہ 19 فروری سے 9 مارچ تک کھیلی جانی ہے۔ پاکستان اس ایونٹ کا میزبان ملک ہونے کے ساتھ دفاعی چیمپئن بھی ہے۔

یہ آئی سی سی کا طے شدہ اصول ہے کہ ایونٹ کے میزبان ملک کا لوگو اس ٹورنامنٹ میں شریک ہر ملک کے کھلاڑیوں کی جرسی پر ہوتا ہے اور اس پر ہر ایونٹ میں عملدرآمد ہوتا ہے۔

چیمپئنز ٹرافی میں شریک ممالک کے کھلاڑیوں کی جرسی پر بھی حسب معمول پاکستان کا لوگو لگا ہوا ہے تاہم بھارت ایک بار پھر کھیل میں سیاست کو لاکر چیمپئنز ٹرافی میں رخنہ اندازی کی کوشش کر رہا ہے۔

بھارتی میڈیا کے مطابق اب بھارتی کرکٹ بورڈ نے چیمپئینز ٹرافی کیلئے مبینہ طور پر ٹیم کی جرسی پر ‘پاکستان’ (میزبان ملک کا نام) چھاپنے پر اعتراض اٹھایا ہے۔

بی سی سی آئی کے اس بے جا اعتراض پر جہاں پاکستان کرکٹ بورڈ آفیشل نے بھارت پر تنقید کرتے ہوئے اس کو ایک بار پھر کھیل کو سیاست کی نذر کرنے کے مترادف قرار دیا ہے، وہیں شائقین کرکٹ بھی بھڑک اٹھے ہیں۔

پاکستان کرکٹ بورڈ (پی سی بی) کے ایک عہدیدار کا کہنا ہے کہ ٹیم انڈیا کی جرسیوں پر پاکستان کا نام چھاپنے سے انکار کرکے ‘کرکٹ میں سیاست’ لانے کی کوشش کررہی ہے۔ جرسی پر ‘پاکستان’ (میزبان ملک کا نام) چھاپنے پر اعتراض صاف طور پر تنازع کھڑا کرنے کی کوشش ہے، جس کا بھرپور جواب دیا جائے گا۔

بھارتی میڈیا بھی بی سی سی آئی کے اس اعتراض پر کڑی تنقید کر رہا ہے اور اس کو کھیل میں سیاست لانے کے مترادف قرار دے رہا ہے۔

واضح رہے کہ بھارتی ہٹ دھرمی کے باعث چیمپئنز ٹرافی ہائبرڈ ماڈل کے تحت کھیلی جا رہی ہے۔ اس کے مطابق بھارت میچز کھیلنے پاکستان نہیں آئے گا اور اپنے تمام میچز دبئی میں کھیلے گا۔ اگر وہ سیمی فائنل یا فائنل میں پہنچا تو یہ میچز بھی دبئی میں ہی کھیلے جائیں گے۔

دوسری جانب بی سی سی آئی چیمپئنز ٹرافی کے آغاز سے قبل افتتاحی تقریب اور کیپٹنز میٹنگ کے لیے اپنے کپتان روہت شرما کو بھیجنے سے بھی انکار کر رہا ہے۔

چیمپئنز ٹرافی پر بھارت کا ایک بار پھر یو ٹرن!