پاکستان ٹیم کے سابق کپتان اور لیجنڈ کرکٹر انضمام الحق کے صاحبزادے رشتہ ازدواج میں منسلک ہوگئے نکاح کی تصاویر سوشل میڈیا پر وائرل ہو گئی ہیں۔

اطلاعات کے مطابق پاکستان کرکٹ ٹیم کے سابق کپتان اور ماضی کے عظیم بلے باز انضمام الحق کے صاحبزادے ابتسام الحق کے نکاح کی سادہ اور پروقار تقریب 23 جنوری کو منعقد ہوئی۔ جس میں دولہا اور دلہن کے اہلخانہ اور قریبی عزیزوں نے شرکت کی۔

مختلف میڈیا رپورٹس اور ذرائع کی جانب سے دعویٰ کیا جارہا ہےکہ ڈومیسٹک کرکٹ کھیلنے والے 24 سالہ ابتسام الحق کا نکاح اقرا عامر نامی لڑکی کے ساتھ ہوا ہے۔

نکاح کی تقریب کی تصاویر ‘دا آرٹسٹ فوٹوگرافی’ نامی انسٹاگرام پیج پر شیئر کی گئی ہیں۔

تصاویر میں ابتسام الحق اور انکی اہلیہ سفید ملبوسات پہن کر ٹوئننگ کرتے دکھے جبکہ انضمام الحق بھی اس تھیم کو فالو کرتے ہوئے سفید لباس میں ہی ملبوس نظر آئے۔

سوشل میڈیا صارفین کی جانب سے بیٹے کے نکاح کی تصاویر سامنے آنے کے بعد انضمام الحق کو مبارکباد دیے جانے کا سلسلہ جاری ہے۔

تقریب کی دلکش تصاویر نیچے دیکھیں:

View this post on Instagram

A post shared by Da Artist Wedding Photography® (@daartistphoto)

پاکستان اور ویسٹ انڈیز کے درمیان سیریز کا دوسرا اور آخری ٹیسٹ کل سے ملتان میں شروع ہو رہا ہے قومی ٹیم میں ایک تبدیلی کا امکان ہے۔

پاکستان اور ویسٹ انڈیز کے درمیان دو ٹیسٹ میچوں کی سیریز کا دوسرا اور آخری ٹیسٹ میچ کل سے ملتان کرکٹ اسٹیڈیم میں شروع ہو رہا ہے۔

قومی ٹیم کو سیریز میں ایک صفر کی نا قابل شکست برتری حاصل ہے اور وہ آخری ٹیسٹ میچ میں ایک تبدیلی کے ساتھ میدان میں اتر سکتی ہے۔

دوسرے ٹیسٹ کی پچ بھی پہلے میچ کی طرح اسپن فرینڈلی ہے۔ اس لیے ذرائع کا کہنا ہے کہ کل سے شروع ہونے والے اس میچ میں پاکستان کے بغیر فاسٹ بولر کے میدان میں اترنے کا امکان ہے اور واحد فاسٹ بولر خرم شہزاد کی جگہ امام الحق کو موقع دیا جا سکتا ہے۔

ذرائع کا کہنا ہے کہ دوسرے ٹیسٹ میں پہلے میچ میں کمال دکھانے والے تینوں اسپیلسٹ اسپنرز نعمان علی، ساجد خان اور ابرار احمد ہی بولنگ کا تمام بوجھ سنبھالیں گے جب کہ ان کی مدد کے لیے آل راؤنڈر سلمان علی آغاز بھی موجود ہوں گے۔

ٹیم ذرائع کا کہنا ہے کہ دوسرے میچ کیلیے پچ تبدیل کردی گئی ہے لیکن حکمت عملی نہیں بدلی گئی ہے۔ بڑے پنکھے اور ہیٹرز لگا کر اسپن ٹریک تیار کیا گیا ہے جب کہ کھلاڑیوں نے تین روز کے دوران بھرپور پریکٹس کی ہے۔

ٹیم مینجمنٹ کا کہنا ہے کہ سیریز دو صفر سے جیتنا چاہتے ہیں تاکہ ٹیسٹ رینکنگ میں بہتری آسکے۔ یہ میزبان ٹیم کا حق ہے اسلیے پچ پر ہونے والی تنقید پر سنجیدگی نہیں دکھائی جائے گی۔

واضح رہے کہ پہلا ٹیسٹ میچ صرف ڈھائی دن میں ہی ختم ہو گیا تھا پاکستان کی جانب سے ویسٹ انڈیز کی تمام 20 وکٹیں اسپنرز نے حاصل کی تھیں جو ایک ریکارڈ بھی ہے۔

اسپن فرینڈلی پچ پر سابق کرکٹرز کی جانب سے سخت تنقید بھی کی جا رہی ہے تاہم ہیڈ کوچ عاقب جاوید نے انہیں اس کا جواب دے دیا ہے۔

آئی سی سی نے سال 2024 کے اختتام پر مختلف کٹیگریز میں بہترین پلیئرز کی نامزدگیوں کا اعلان کیا تھا اور اب فاتحین کا اعلان ہوگا۔

انٹرنیشنل کرکٹ کونسل (آئی سی سی) ہر نئے سال کے آغاز پر گزشتہ برس کے ٹیسٹ، ون ڈے اور ٹی ٹوئنٹی فارمیٹس میں بہترین کھلاڑیوں کے ناموں کا اعلان کرتا ہے۔

حسب سابق گزشتہ سال کے اختتام پر بھی ان کٹیگریز میں نامزدگیوں کا اعلان کر دیا گیا تھا اور اب شائقین کرکٹ بے چین ہیں کہ کب سال 2024 کے بہترین کھلاڑیوں کا اعلان ہوتا ہے۔

آئی سی سی نے آج ون ڈے ٹیم آف دی ایئر کا اعلان کر دیا ہے۔ اس ٹیم میں پاکستان کے تین کھلاڑی صائم ایوب، شاہین شاہ آفریدی اور حارث رؤف کو شامل کیا گیا ہے۔

آئی سی سی کی جانب سے آج ٹیسٹ کی سال 2024 کی بہترین ٹیم جب کہ کل (25 جنوری) کو ٹی 20 ٹیم آف دی ایئر اور اسی فارمیٹ کے سال کے بہترین کھلاڑی کے نام کا اعلان بھی کر دیا جائے گا۔

امپائر آف دی ایئر اور ایمرجنگ پلیئر آف دی ایئر کا اعلان اتوار 26 جنوری کو ہوگا جب کہ 27 جنوری (پیر) کو ون ڈے اور ٹیسٹ پلیئر آف دی ایئر کا اعلان کیا جائے گا۔ 28 جنوری کو مینز اور ویمنز کرکٹر آف دی ایئر کے ناموں کا اعلان ہوگا۔

واضح رہے کہ بہترین کھلاڑیوں کی نامزدگیوں میں پاکستان کی جانب سے دو کرکٹرز کے نام شامل کیے گئے ہیں۔ اسٹار بیٹر بابر اعظم ٹی 20 کرکٹر آف دی ایئر جب کہ نوجوان بلے باز صائم ایوب ایمرجنگ پلیئر آف دی ایئر کے لیے نامزد ہیں۔

آئی سی سی ون ڈے ٹیم آف دی ایئر کا اعلان، پاکستان کے 3 کرکٹرز شامل