سعودی عرب میں وزارت داخلہ نے حج ضوابط اور ’مکہ پرمٹ‘ کی خلاف ورزیوں پر جرمانے اور سزا کا اعلان کردیا ہے۔ جو بھی خلاف ورزی کا مرتکب پایا گیا ایک لاکھ ریال تک جرمانہ اور مملکت کے لیے بلیک لسٹ کیا جاسکتا ہے۔
سعودی خبررساں ادارے کی رپورٹ کے مطابق وزارت داخلہ کا کہنا ہے ایسے افراد جو حج پرمٹ کے بغیر حج ادا کرنے کی کوشش کریں گے، ان پر 20 ہزار ریال جرمانہ عائد کیا جائیگا۔
مکہ پرمٹ کے بغیر کسی بھی غیرملکی کو یکم ذوالقعدہ بمطابق 29 اپریل سے 14 ذوالحجہ تک کسی بھی نوعیت کے وزٹ ویزے پرآنے والے غیرملکی مکہ مکرمہ یا مشاعرمقدسہ میں داخلے کی اجازت نہیں ہوگی، خلاف ورزی کرنے والے کو بھی 20 ہزار ریال جرمانہ ادا کرنا ہوگا۔
کوئی بھی ایسا شخص جس نے اپنے نام پر بیرون ملک سے ایک یا متعدد وزٹ ویزے (تمام اقسام) کے جاری کرائے ہوں اور وزٹ ویزے پر آنے والے غیرملکی ممنوعہ مدت (یکم ذوالقعہ) میں مکہ مکرمہ داخل ہوں اور حج ادا کرنے کی کوشش کریں اس صورت میں وزٹ ویزا جاری کرنے والے پرایک لاکھ ریال جرمانہ ہوگا۔
وہ افراد جو وزٹ ویزے پر آنے والوں کو مکہ مکرمہ یا مشاعر مقدسہ جانے کے لیے ٹرانسپورٹیشن کی سہولت فراہم کریں۔ ایسے افراد جو مکہ مکرمہ یا مشاعر مقدسہ میں غیرحاجی کو(حج سیزن میں) قیام کی سہولت فراہم کریں ان پر بھی یہی سزائیں لاگو ہوں گی۔
دوسری جانب واضح رہے کہ پاکستان سے حج آپریشن کا باقاعدہ آغاز ہوگیا ہے، اسلام آباد ایئرپورٹ سے پہلی حج پرواز عازمین حج کو لیکر مدینہ منورہ روانہ ہوگئی، وفاقی وزیرمذہبی امورسردار محمد یوسف اور سعودی سفیر نے عازمین حج کو رخصت کیا۔ اس موقع پر وفاقی وزیر کو روڈ ٹو مکہ امیگریشن منصوبے پر بریفنگ دی گئی۔
اے آر وائی نیوز کے مطابق اسلام آباد سے پی آئی اے کی پرواز 713 آج صبح 393 عازمین کو لے کر روانہ ہوئی جبکہ کوئٹہ سے پی آئی اے کی پرواز 7201 صبح ساڑھے نو بجے 150 مسافروں کے ساتھ روانہ ہوئی۔
ملتان سے پی آئی اے کی پرواز پی کے 715 رات کو 393 عازمین کو لے کر روانہ ہوگی جبکہ کراچی سے پرواز ای آر 1611 رات ساڑھے نو بجے 285 عازمین کو لے کر روانہ ہوئی۔
لاہور سے حج کی پہلی پرواز پی ایف 7700 ڈیڑھ سو عازمین کو لیکر مدینہ منورہ روانہ ہوئی، وزیر صحت خواجہ سلمان رفیق نے عازمین حج کو مقدس سفر پر روانہ کیا۔
عازمین حج کے لیے نسک کارڈز کی تقسیم شروع
لاہور سے دوسری پرواز پی کے 747 تین سوانتیس عازمین کے ساتھ رات سوا 10 بجے روانہ ہوگی۔ حج آپریشن کے پہلے روز 6 پروازوں کے ذریعے عازمین کو حجازمقدس پہنچایا جائے گا۔ حج ڈیپارٹمنٹ کے ڈائریکٹر حج سینٹرل پنجاب محمد رضوان شریف اور دیگر عہدیداران بھی موجود تھے۔
